Shillong, Lber 25 : ïa ka 1st A R Mawthoh Memorial Football Tournament 2024 ba la pynlong da ka Nongrim Hills Sport Social and Cultural Club la plie pyrda mynta ka sngi ha madan jong ka Meghalaya Football Association Turf, Polo da u Paiem Dr Balajied Sing Syiem, Syiem ka Hima Khyrim ha ka jingïadon lang u Paiem Ainam Manik Syiem, Syiem ka Hima Mylliem kum u Symbud Kongsan, ki Rangbah Shnong hapoh ka shatri ka Synjuk ki Nongthymmai Pyllun kaba kynthup ïa ki 15 tylli ki Dorbar Shnong, Rangbah Shnong ka Laitumkhrah bad Rangbah Shnong ka Lapalang.
Haba kren ha ka jingplie ïa kane ka Tournament I Paiem Dr Balajied i la ai ka jingïaroh ïa i bah A.R Mawthoh iba la long ruh kum u Myntri ka Hima Khyrim ba i long u briew uba shim khia ïa ka kam wat kum u Rangbah Shnong jongka Nongrim Hills ruh namar ka shnong ka long kaba shongsuk shongsaiñ bad kaba ïaid beit ka synshar ka khadar. I la kyntu ban bud nuksa ïa ki dienjat kiba la ïalam bad btin da une u Rangbah. I la ïathuh ha ki 10 snem ba i la bat kum u Myntri i la shim khia bha ïa ka kam da kaba beh ha kylleng u pud u sam ka Hima ban pynbeit ïa ki kam ki jam. I ai khublei ïa ka ïing ka sem, ki khun ki kti, ki kur ki jait bad khamtam ïa ka Nongrim Hills SS & CC kaba la lah ban pynlong ïa kane ka Tournament ban pynsahnam ïa une u rangbah uba trei hok ïa ka kam.
Khyndiat shaphang i bah A.R Mawthoh ( Bam Kwai ha Dwar U Blei) i la long kum u General Secretary ba nyngkong eh jongka Nongrim Hills SS&CC kaba la seng ha u snem 1978. Shwa kane ka snem ka Club ka don ha Nongthymmai SC.
I la trei shitom bha ïa ka kam ba la bynshet ha i bad ka Club ka la nang kiew shaphrang.
Ha u snem 1987 i la shah jied kum u Asst. Rangbah Shnong jongka Dorbar Shnong Nongrim Hills bad ha u snem ba bud kata ha u 1988 hadien ka jingïehnoh kam u Rangbah Shnong i la pynïaid bad shimti kum u Acting Rangbah Shnong haduh u snem 1991.
Ha u snem 1991 la jied ïa i kum u R.S ba pura bad i lah bat ïa ka kam haduh u snem 1998. Hadien kine ki snem i la bteng kum u Executive Member jongka Dorbar Shnong bad Sport Club tad haduh u snem 2013 ba la jied pat ïa i kum u President ka Nongrim Hills SS &CC haduh ka sngi ba i la khlad noh na kane ka pyrthei.
Ka Club ka la kiew irat bha hapoh ka jingïalam jongi bad ka la wanrah ïa shibun ka nam ka burom ïa ka Shnong ka thaw.
Ha kane ka sngi plie ïa kane ka Tournament ki kynhun ba la ïalehkai ki long ka Nongrim Hills SS & CC bad ka Laitumkhrah SC. Ha ka jingïakhun ba itynnad bha ka Nongrim Hills SS & CC ka la pynliem ïa ka Laitumkhrah SC da 2-1 kol.
