Jowai, Lber 25: Ka Dorbar Shnong Pdengshakap kaba pynïaid ïaka jingïalehkai phutbol ïaka ba la tip kum ka 10th Secondary School football knock-out Tournament 2023-24 ha kane ka sngi saitjaiñ bala dep ka la ïoh ban pyn ïalehkai ïaka jingïalehkai Semi-final ba nyngkong hapdeng ka Rymbai Shkenshynriah SC pyrshah ïaka Thrangchynnam FC ha kaba ka Rymbai Shkenshynriah SC kala jop ïaka Thrangchynnam FC da 2-1 kol.
Hapdeng jong ka jingïalehkai ka Rymbai Shkenshynriah SC kala ïoh ban thep shwa arkol daki kol bala thep da u Younis Suchen haka minit kaba 37 bad ïaka shikol pat la ïoh ban thep da u Nickel Bina haka minit kaba 56.Katba ïaka shikol naka bynta ka Thrangchynnam FC la ïoh ban thep da u Timmy Ryngkhlem haka minit kaba 66 jong ka kylla miet.
Kumta ka Rymbai Shkenshynriah SC kala buh jaka ïalade shaka Final jong kane ka Tournament.
Naka liang jong ka Tournament Committee ka la rai ban bteng biang ïaka jingïalehkai Semi-final kaba ar haka 30 tarik mynta u Lber ka ban long hapdeng ka YFC Trangblang pyrshah ïaka Thun FC haka por 2 baje nohphai sngi.
Kumta naka liang jong ka Tournament Committee ka khot bad wer ïa baroh ki paid ieit football jong ka thaiñ ban wan sakhi lang ïakane ka jingïalehkai Semi-Final ba khadduh.
