Shillong, Lber 25: Ka kynhun ïalehkai jong ka Nongthymmai SC ka la ïoh ban khur ïa ka namjop kaba nyngkong jong ka ha ka lympung Shillong Premier League mynta ka samoi 2023-24 hadien ba pynliem ïa ka Nangkiew Irat SC da 2-0 kol ha SSA Stadium, First Ground, Polo, hynne ka sngi.
Ha kane ka jingïakhun ki ar kol na ka Nongthymmai la thep da u Y Gopi Singh (58’) bad u Iohborlang Nonglyer (66’) bad baroh ar ki la wan ha ka kylla miet.
Kumban shu pynkynmaw, ka Nangkiew Irat ka la sdang ïa ka samoi da ka namjop da 2-1 kol pyrshah ïa ka Sawmer SC ha ka jingïakhun kaba la long ha ka Sngi Hat Majai jong ka taïew ba ladep katba ka Nongthymmai, ka kynhun kaba dang shu kiew shen ha ka SPL, ka la liem ha ka sngi sdang ïa ka lympung ha ka Rangdajied United da 1-0.
Lah ban kdew hangne ba ka Nangkiew Irat kam shym la lah ban ïalehkai kumba long ha ka jingïakhun ba ladep, bad ki player kiba long ka jingma ïa ka liang pyrshah ki long na u kapten- u Shaibor Nongrum bad u M Nikhil Raj hynrei baroh arngut ki la shah khanglad ha ki bak ba skhem jong ka Nongthymmai.
Kaba kut jong ka kylla step ym shym la don satia ba lah ban pynkhihjar kaba la pynlong ïa ka jingïalehkai ban ïakhaid da 0 kol. Tang hadien katto katne minit ba la ïaid ka por ha ka kylla miet ba u Y Gopi Singh (58’) ka Nongthymmai u la ïoh ban khyrwit ïa ka kol kaba nyngkong ïa ka kynhun.
Khyndiat minit hadien ba ka Nongthymmai ka la ïoh ban thep ïa katei ka shi kol, u Iohborlang u la ïoh ban pynbud ïa ka kol kaba ar ha ka 66 minit, bad lyngba kane ka kol, ka Nongthymmai ka la nang kyrmen ban khur ïa ka jingjop.
Haduh kaba kut jong ka por ym shym la don shuh ba lah ban pynkhihjar kaba la pynlong ïa ka Nongthymmai ban khur pura shalade ïa ki point.
Ka jingïalehkai mynta ka sngi kan long hapdeng ka kynhun ba wan kyrdan ba ar ha ka samoi ba ladep, ka Rangdajied pyrshah ïa ka Sawmer, ka kynhun kaba dang shu kiew kyrdan na ka First Division.
