Jowai, Lber 25: Ka Samla Phyrnai Kyndait, kaba dang 22 snem ka rta naka shnong Mukhialong East Jaiñtia Hills District, kaba dang pule 4th Semester Bachelor of Arts ha Kiang Nangbah Govt. College Jowai kala long kawei na ki samla kynthei napoh ka Ri-Lum Jaiñtia kaba paw bha ha ka jingñiah Cycle ha ki jingïakhun kiba ka leit ban ïashim bynta.
Dang ha une u snem bala dep 2023 ka Samla Phyrnai Kyndait kala ïoh rah ïa ka nam ba nyngkong (Gold Medal) haka XCO Open Women Category jong ka 6th National Level MTB Tawang Cycling Competition bala pynlong da ka Arunachal Cycling Association and Cycling Federation of India, bala wan ïashim bynta da ki nongñiah cycle na kylleng ka Ri India bad nabar Ri kumjuh.
Kane ka samla kala wan ba nyngkong (Gold Medal) kumjuh haka 5th Meghalaya Games 2024 kaba dang shu dep long ha nongbah Tura West Garo Hills, kala jop haka kyrdan XCO women open category/Mass Star.
U Mawphor haba ïakren bad kane ka samla haka por ba wan ban pyni ïa ka sap ñiah Bicycle jong ka haka prokram pynkup burom ka BAM-JH ïa ki 24 ngut ki samla bala shah hikai ban long kum ki Security Guard ha jaka training ka BAM.
la pynsngew “Kum ka khynnah naduh u snem 2014 kala sdang ïa ka jingïalehkai Sports (Athletic) da ka jingïalam lynti jong ka para ba byngkong jong ka bad ha u snem 2022 kala sdang ban ñiah Cycle da ka jingïalam u para ba heh jong ka”, ki don 11 ngut shipara bad ka dei ka khun ba lai jong ka kong Roithai Kyndait bad u ma Kmenlang Phawa.
Ha ka juh ka por ka ai khublei kyrpang ïa ki seng ki nongñiah Cycle kata ka West Jaiñtia Adventure Cycling Association (WJACA) bad ka Meghalaya Cycling Association (MCA) kiba la ai lad ïa ka ban leit ïa shim bynta haka Tawang bad kumjuh haka Meghalaya Game.
Kala pynsngew ba ka jingïakynduh jong ka bad ki nongïalam jong ka BAM-JH ka dap da ka jingsngewkmen kaba khraw khamtam ïa u President ka seng u ma Yoosar Kynjing uba la ai mynsiem ba kan ïaid shakhmat ban pynpaw pyrthei ïa kane ka sap ba ka don kaba ai mynsiem ïa kiwei de ki para samla ka Ri-Lum Jaiñtia.
Ha ka juh ka por ka ai khublei kyrpang ïa ka kmie, u kpa jong ka bad ïa ki kur ki jait kiba la ai mynsiem ïa ka bad khamtam ïa u MLA ka Khliehriat ma Kyrmen Shylla u myntri ka sorkar jylla uba la ai jingïarap katba kot ka bor haka por ba leit ïashim bynta sha Tawang.
“Kane ka jingjop jong nga ha kine ki jingïakhun bala dep ka dang ai mynsiem shuh shuh ba ngan bteng ïa kane ka jingñiah Cycle ha kine ki sngi ban wan da ka jingdon ryngkat u Blei Trai kynrad” ong ka samla Phyrnai.
Shuh shuh kala ong haka jingñiah Cycle ki don shibun ki jingeh khamtam ïa ka Bicycle kaba rem palat ha ka dor, ka Bicycle kaba kane ka samla ka pyndonkam mynta ka long 50 hajar tyngka ban ka rukom Maintenance ruh ka long kaba eh, hynrei haba don ki jingïakhun bah eh ka dang donkam ban ïoh ïa kaba kham bha.
Kum ka samla ka kyntu ïa kiwei de ki para samla ba kin mih shakhmat ban pynpaw pyrthei ïa ka sap ka phong ba ki don khlem da buhrieh bad kaba donkam eh ban don ka jingtei shitom ban minot thop bad ka mynsiem ïaleh, khnang ban ïoh ka jingjop ha ki jingïakhun, kala kyntu ba ym dei ban sngap ïa kino kino ki jingshah kren kiba bun rukom bad dei ban ïaid beit ha ka lynti ba bha.
“Nga dang don jingmut ban kiew shuh shuh ha kane ka rukom ñiah Cycle ban tip khambniah ïa ka rukom balance ïa ka Cycle, ka rukom bam ban ïoh ïa ka bor met kaba khlaiñ bad ban nang ban tehlakam ïa ka Cycle khamtam haba ñiah haki jaka off Road kiba hap ban kiew bad hiar ïa ki riat bad ban jam ïa ki lum ki wah, katba ha ki surok ka kam suk khyndiat” ong katei ka samla.
Ka jingpoi jong nga ban ñiah cycle ka dei na ka daw jong u Para ka samla Phyrnai uba la aiti haka ïaka Bicycle, da kaba kyntu ba kam dei ban pynlehnoh ei ïa ka Bicycle kaba ula thied bad ka dei ban pyndonkam hok ïa ka, lyngba kitei ki kyntien kala leit ban ïashim bynta da katei ka Bicycle ban ïoh ruh ïa ka jingjop ha ki jingïakhun.
