Da ka jingrai ka BJP ban kyrshan ïa ka Seng NPP ha ka elekshon MP na Shillong bad Tura, ka saiñpyrthei ha ka Meghalaya ka la kylla sted. Ki paidbah ki la sah ha ka lyngngoh kumno ka Party kaba heh tam ha ri India kam lah ban pynïeng kyrtong ha ki jylla kiba rit kum ha Meghalaya, Manipur bad Nagaland?.
Kaei kaba don sha lyndet jong kane. Namar kane kadei ka sien kaba nyngong ba ka BJP ka, shym la pynïeng kyrtong ha ka elekshon MP ha Meghalaya, namar ha ki elekshon kiba ladep, wat lada ka BJP bad ka NPP ki ïatreilang ha ka sorkar ruh, ka BJP ka la pynieng kyrtong ha ki elekshon sha Lok Sabha. Ha ka elekshon kaba ladep lei lei, kata ha ka elekshon MLA 2023, ka BJP ka la ther tyngeh haba ki nongialam jong ka, ki wan ialap elekshon shane, da kaba kynnoh ruh artad ba ka sorkar Meghalaya kaba la ïalam da ka NPP kadei ka sorkar kaba bamsap tam. Phewse tang hadien ka elekshon, ki heh duh jong ka BJP naduh u Myntri Rangbah, u Narendra Modi, u Myntri kam pohïing, u Amit Shah, ki la wan lang ha ka sngi ba pynsmai ïa ki Myntri jong ka sorkar u Conrad Sangma. Imat ka jingïadei kine ki ar Seng ka la sdang naduh katei hi ka por bad ki jingïakynnoh ha ka por elekshon, kidei tang ka drama ban pynbieit paidbah.
Hangne pat kiba bun hi ki paidbah khamtam ki Liang Pyrshah ki la ju ong ba ka BJP bad ka NPP kidei kijuh, hynrei ki shu ïapher tang ki kyrteng, ka BJP da ka kyrteng Hindi bad ka NPP pat da ka kyrteng phareng. Hynrei ka rukom treikam kadei kajuh. Wat la katta ruh ka shong ha u paidbah ban bishar khamtam ha kaba ïadei bad kane ka elekshon Lok Sabha, kabaka ri India ka khmih lynti ba ka BJP kan wan biang sa shisien pat ha ka bor.
Lah ban kdew hangne ba ka election sha Lok Sabha na bynta ka samoi ba 18 ka ïingdorbar ne 18th term ka Lok Sabha kaban long ha ki 7 tylli ki phase ha kaba ka elekshon ha ka jylla kan thep vote ha ka phase ba nynkong kata ha ka 19 tarik Iaiong 2024.
Ka jingthep vote ha ka Second phase kan dei 26 ïaong, ka Third phase 7 Jymmang, 4 phase 13 Jymmang, 5 phase 20 Jymmang, 6 phase 25 Jymmang bad ka 7 phase kan dei ha ka 1 Jylliew bad ka tarik ban niew vote ia la elekshon MP kan dei ha ka 4 tarik u Jylliew 2024.
Haba kren sha ki lad pathai khubor u CEC u la iathuh ba kin don 96.8 klur ngut ki paidbah kiba la don la hok ban jied ia ki MP bad na kine ki don 49.7 klur ki shynrang bad 47.1 klur ki kynthei. U la iathuh ruh na napdeng kine ki don 19.74 klur ki nonthep vote kiba hapdeng ka rta 21 haduh 29 snem.
Lada phai ka jylla Meghalaya u Chief Electoral Officer jong ka Jylla u Dr. BDR Tiwari ha ka 16 tarik u Lber, 2024 u la pyntip ba ki nongthep vote ha Meghalaya haduh une u snem 2024 ki don 22, 17,100 lak ngut ban rai ïa ka lawei san snem jong ki kyrtong na Shillong bad na Tura ha ka eleshon Lok Sabha ka ban sa long ha ka 19 tarik Ïaiong, 2024.
Ki nongthep vote shynrang ki don 10,94, 947 ngut, ki kynthei ki don 11,22,150 ngut bad 3 ngut ki Third Gender. Ha ka jingïalang bad ki lad pathai khubor tang hapoh khyndiat kynta ba ka Election Commision of India ka la pynbna ïa ka tarik ban pynlong ïa ka elekshon Lok Sabha, u Tiwari u la ong, ka jingkiew ki nongthep vote na u snem 2023 haduh kaba sdang jong ki ar bnai jong u snem 2024 ka long 55, 971 ngut.\
Ki nongthep vote ba dang shu pynrung kyrteng thymmai ha ka Electoral Roll, 2024 ki long, 56,909 ngut, ki Service Voter ki don 3835 ngut, ki nongthep vote ba duna dkhotmet ki don 11179 ngut, ki nongthep vote ba la kynjoh 80 snem ka rta shaneng ki don 23, 793 ngut bad 5 ngut ki Non Resident Indian (NRI). Ki Polling Station ki don 3512 tylli, ba kynthup 326 tylli ha ki jaka sor bad 3186 tylli sha ki jaka nongkyndong.
Ha Meghalaya hi ka elekshon MP kam dei ka elekshon kaba shongshit kumba long ha ka elekshon MLA ne MDC ruh. Kadei ka elekshon kaba jar jar bad kaba bobarabor hi ka jingwan ki nongthep vote ruh ka duna bha. Hynrei mynta u snem ka shu i shongshit da ka jingleit ka Seng VPP kylleng kylleng ki jaka jong ka Ri Khasi bad Jaiñtia na ka bynta ban pynshai ïa ki nongrim bad ki mat treikam ka Seng kaba la sdang naduh ba ladep ka elekshon MLA jong u snem 2023. Hynrei namar ba ka Party ka la pynbna lypa ïa u Kyrtong MP da kaba pynieng ïa u Dr. Ricky AJ Syngkon, kane ka jingleit ka la kylla long ruh syndon ka jingïalap na ka bynta ka elekshon MP. Katba nang jan ki sngi sha ka jingpynbna ia ka elekshon MP, ka jingialap ruh ka la nang shongshit kat haduh kaba la pynlong ruh ia kiwei pat ki Party ban ther beit ia ka Party VPP bad bun ki la klet noh ïa ki mat ne ki ishu kiba kidei ban kren.
