La nang tlot bor ka VPP ha Jaiñtia Hills pynïasoh da ki spah ngut ki nongïalam bad dkhot sha ka NPP

Shillong, Naitung 19 : Kum ka jingai mynsiem bad nang pynkhlaiñ shuh shuh ïa ka National Peoples’ Party(NPP) shwa ka Bye Election MP Lok Sabha, da ki spah spah ngut ki nongïalam bad nongkyrshan jongka Voice of the People Party (VPP) ki la wan ban pynïasoh sha ka NPP ha ka prokram ba la pynlong kyrpang ha ka shnong Nongjngi, West Jaintia Hills ha ka Sngi Saitjain,
ïa kane ka prokram la pynphuh pynphieng da ka jingïadon lang u Symbud Myntri Rangbah uba dei ruh u National Vice President ka NPP u ma Sniawbhalang Dhar.
Kumba long mynta na Nongjngi MDC dei na ka VPP. Hynrei da kane ka jingpynïasoh kine ki Nongïalam bad dkhot ka VPP ka paw shai kdar ba kane ka party ka la nang tlot bor mynta ha ri lum Jaintia.
U Ma Snaiwbha u la ong kane ka rai jong ki Nongïalam bad nongtrei ka VPP ban pyniasoh sha ka NPP ka pyni ba ki briew ha katei kajaka ki la bishar bniah bha ïa ka jinglong jingman ka saiñ pyrthei bad kumta ki la jied ban rung noh sha ka NPP namar ki kwah ban ïohi ïa ka roi ka par jong ka shnong ka thaw.
“Lyngba ka jingïatreilang, ngin sa lah ban wanrah ïa ki kam pynroi kumba phi, ki nongshong shnong, phi kwah. Ka saiñ pyrthei kam lah ban pynhun ïa baroh. Hynrei haba ngi ïatreilang, ngi lah ban leh shibun kiei kiei kaba kwah u paidbah” ong u Bah Sniawbhalang.
Ula kyntu ïa kine ki dkhot ba thymmai ba kin kren pynsngewthuh lem sha la ki jong ki bahaïing hasem bad ki marjan marpa.
“ïathuh ïa kiba haïing hasem, “Ngi ki paidbah ka Lumstong ngi la pyrkhat thymmai. Mynta ka dei ka pali jong phi ban ïawan lang noh” ula ong.
Da ka jingnang jan ka jingpynlong ïa ka elekshon shiteng samoi ka Shillong Parliamentary, u Ma Sniawbhalang ula buh ïa ka thong kaba shai na ka bynta ka shnong, kaba don palat 6000 ngut ki nongthep vote.
“Ka thong jong ngi ha kane ka elekshon MP ban wan ka long ba lada long kumno kumno ruh, ngi dei ban ïoh ym duna ïa ka 4000 vote. Lada ngi ïoh 4000 vote na kane ka thaiñ, Ngan sa pyni ïa ka kam na ka bynta ka shnong Nongjngi kaba baroh kin sa sah jingkynmaw” ula ong.
U DyCM ula pynpaw ruh ba u don kumba 700 ngut ki nongtrei ka party tang ha ka shnong Nongjgi bad ula leit ïakynduh dalade ïa ki nongshong shnong, kam pher la ki dei na kano kano ka party.
Haba kynthoh pyrshah ïa ka VPP, u Ma Sniawbhalang ula ong ba ki nongthep vote ki la sngewthuh ba ka jingkyrshan ba ki ai sha ka VPP ha ki elekshon ba la dep ka dei kaba shah ïalam bakla.
“Don kiba ong ba ngi la leh bakla namar ba ngi la ngop ha ka jingrwai jong ki bad ngi la leit ban kyrshan ia ka Prah. Nga sngewthuh- haba ki riew rangbah bad ki nongïalam ki ïeng ha ka nongrim, ki paidbah ki ïabud ïa ki” ula ong.
“Hynrei nga kmen ba hapoh shisnem lane arsnem, ki paidbah ka Lumstong ki la sngewthuh ba ka lynti ba ki shim mynshuwa- ban kyrshan ïa ka VPP- ka dei ka lynti kaba bakla” bynrap u Ma Sniawbha.