Shillong, Naitung 19 : Ka Sherilin Khongwar kaba dei ka puron jong ka phlim Tyngkai ka la khur ïa ka khusnam Best Actor Female 2025 Audience Poll ha ka jingïalang sam khusnam kaba long ha State Convention Centre Shillong kaba la pynïaid da ka Meghalaya Film Makers Association kaba la ïatreilang bad ka Hello Meghalaya.
Ïa kane ka khusnam ka Sherilin ka la pdiang na ka kti jong u Secretary ka North Eastern Council (NEC) Shillong u Satindar Kumar Bhalla ha ka sngi Saitjain Ha kane ka sngi ka Meghalaya Film Makers Association ka la ïoh ban rakhe ïa ka jingdap 16 snem ka jingïaid lynti jong ka ban wanrah ïa ka jingtehsong ïa ki nongpynmih phlim hapoh ka jylla Meghalaya.
Ryngkat bad ka Sherilin Khongwar, ka Ïairy Sumer ka la shah jied kum ka Best Actor Female 2025 Jury’s Choice na ka phlim Khor bad ka Barisha Mawlong ka la shah jied Best Actor Female 2025 Platforms Choice ba ka phlim Raibi.
Na bynta ka khusnam Best Director ki don lai tylli ki kyrdan kata u Dapborlang Disar na ka phlim Dukhi u la shah jied kum Best Director Audience Poll, u bah Kenney Lyngdoh na ka phlim Khor u la shah jied Best Director Jurys Choice bad Bah Section Syiemlieh la shah jied kum Best Director Platfom’s Choice.
Shuh shuh u Bah Jeremy Khongjee na ka phlim Khor u la shah jied ban pdiang ïa ka khusnam Best Actor Male Audience Poll, u Sunny Bosco Shadap na ka phlim Dukhi kum Best Actor Male Platform’s Choice bad Bah Lansius Syiemlieh na ka phlim Tang Shiteng por u la shah jied kum Best Actor Male Jury’s Choice.
Na bynta ka khusnam Best Supporting Actor Male, u Samborlang Mawlong na ka phlim Dukhi u la shah jied ha ka Audience Poll, u Bah Keebor Kurbah na phlim Sianti ha Platform’s Choice, u Goldenstar Suchiang na phlim Raibi ha ka Jury’s Choice.
Ha ka liang ka khusnam Best Supporting Female Actore, ka samla Betsika Mangu na phlim Wad Daw ka la shah jied na ki Audience Poll, ka samla Rishisha Mynsong na phlim Tyngkai na Platforms Choice, ka kong Banatimon Mawlong na ka phlim Khor na Jury’s Choice.
Katba ha ka Best Actore in a Negative Rolle, u bah Arman Disiar na ka phlim Raibi u la shah jied na Audience Poll, u bah David Kharkongor na phlim Dukhi na ka platform’s Choice, u bah Jester Nongbet na phlim Khor u la ïoh na Jury’s Choice.
Ïa kine ki khusnam la bishar da ka Hello Meghalaya kaba dei thik tang ïa ki phlim kiba la dep ïoh Central Board of Film Certification, Guwahati bad kiba dei ba la pyni ha Hello Meghalaya OTT.
