Katba dang don ka sorkar NPP da lei lei ngin ym ailad ban tih Uranium ha ka jylla: Working President

Shillong, Naitung 19 : U Working President ka National People’s Party (NPP) ba dei ruh u Chief Adviser ka sorkar Jylla Bah Hamletson Dohling u la ong ba katba dang don ka sorkar NPP ha ka jylla da lei lei ruh kin ym ailad satia ban tih Uranium.
“Nga kwah ban kren shai sha ki paidbah nongshong shnong jong ka Meghalaya ba katba dang don ka sorkar NPP da lei lei ruh ngin ym ailad ban tih Uranium,” ong u Bah Hamlet haba kren ha ka jingïalang ïalap elekshon na bynta u kyrtong ka party ha ka taiew ba la dep.
Shuh shuh u la ong ruh ba kum ki nongïalam ki don ka jingsngewkhia halor kane ka bynta namar kim kwah ba ka jylla kan sakhi ïa ki jingjia bym sngewtynnad lada tih ïa une u marpoh khyndew.
“Kynmaw paidbah ba u Uranium um don tang ha ka thain Domïasiat hynrei u don ruh ha ka thain Mawsynram bad ki bynta ba shathie haduh Nongbareh,” u la bynrap shuh shuh.
Ha kajuh ka por u la ong ba lada shah ban tih ïa une u marpoh khyndew khlem pep kan don ka jingktah kaba jur ïa ki nongshong shnong ka jylla.
“Kum ka party NPP ngi sngewkhia ïa kane ka bynta bad kumta ngi ong ba da lei lei ngin ym shah ban khlong ïa une u mar Uranium napoh Domïasiat bad na ka ri jongngi,” u la bynrap biang.
Shuh shuh u la ong ba watla kiwei kin pynbor hynrei na ka liang ka part NPP kan ieng skhem beit ban ong em ban ym shah ban tih ïa une u marpohkhyndew.
Lah ban kdew hangne ba dang shen ka sorkar jylla ka la rai ban wanrah da ka Resolution ban pyrshah ïa ka jingtih uranium ha Jylla ha ka Dorbar Synrai jong ka ïing Dorbar Thaw Aiñ ka Jylla, ka ban long ha u bnai Nailar, ong u Myntri Rangbah Conrad K Sangma ha ka sngi Thohdieng.
Haba kren sha ki lad pathai khubor dang hen, u Conrad u la pynpaw ba ka ïing Dorbar kan hap ban ïakynduh hashuwa ka 27 tarik Nailar ban pynbiang ïa kaei kaba la buh da ka Riti Synshar ka Ri kaba long hynriew bnai hapdeng artylli ki dorbar.
“Hooid, ïa ka resolution yn sa wanrah ha ka Dorbar Synrai ban wan jong ka ïing Dorbar Thaw Aiñ, ka ban long ha u Nailar. Ka 27 tarik Nailar ka dei ka sngi kaba dei ban khot ïa ka Dorbar namar ka hynriew bnai kan kut ha ka 27 tarik u Nailar” ong u Myntri Rangbah.
U Conrad ula ong ba ha kane ka dorbar Synrai jong ka ïing Dorbar, ka Sorkar kan sa wanrah ïa kane ka resolution.