Nongstoiñ, Naitung 19: Ka jingbym don ïa ka surok kaba biang na Tynghor haduh Athiabari, ka la buh ha ka jingeh kaba khraw ïa ki paidbah ha ka leit ka wan bad ka kit ka bah.
Ki katto katne ki riew paidbah nongshong shnong jong katei ka thaiñ naduh Langja, Umthlong, Tynghor, Nongthymmai, Domjaraiñ, Nongmawleiñ, ki la pynpaw ïa ka jingsngewdiaw halor katei ka jingbym biang jong katei ka surok, kaba la long ka jingeh kaba khraw ha ka leit ka wan khamtam ha kane ka aiom lyiur.
U Bah P.Marngar sordar shnong Tynghor, u la ong ba na katei ka shnong haduh Athiabari ka don tang kumba 16 kilomitar ka jingjngai. Lada la pynbha ïa katei ka surok ka la long ka jingkyrkhu kaba khraw ïa baroh ki shnong katei ka thaiñ, namar ki ïew kiba jan eh ki dei ha Hahim bad Boko kiba dei ki ïew jong ka Assam.
U la ong ba na katei ka shnong haduh Nongstoiñ ka jingjngai ka long 56 kilomitar. Lada leit siew leit tda na Nongstoiñ ka jinglut ha ka bai leit bai wan bad ka bai kit bai bah ka la long saw shah, nalor ba ki mar ki mata naduh ki mar bam bad kiwei kiwei, ka dor na ïew Hahim bad Boko ka ïapher bak lybak na ka dor ba die ha Nongstoiñ
Halor kane, u Bah K.P.Pangniang MLA barim ka thaiñ, u la dep ban pynpaw ruh naduh ki por ba la dep, ba ha ka jingshisha ïa katei ka surok ka sorkar lyngba ka skhim Pradhan Matri Gramsadak Yojana (PMGSY) ka la dep khot Tender la ar sien. Hynrei na ka daw jong ka jingrit palat ka mang pisa, ki Kontraktor kim nud ban thep ïa ka Tender.
U la ong ba na ka liang jong u ryngkat ki nongïalam ka Synjuk Rangbah Shnong jong katei ka thaiñ, ki la leit ban ïakynduh ïa u Chief Executive Engineer ka PMGSY ha Shillong bad ki la buh ruh ka jingkyrpad lyngba ka jingthoh, ba ka sorkar kan pynheh biang ïa ka mang pisa na ka bynta ban pynbha bad siang rong ïa katei ka surok.
U Bah Pangniang u la ïathuh ruh ba na ka liang utei u heh sorkar u la kular ban pynsngew sha ka sorkar pdeng ba kan leh ïa kaba donkam, khnang ba ka jingpynbha ïa katei ka surok kan ym sep ei.
