La 7 bnai ym Nonghikai ha Sohkha Govt HS School, mad jingeh ki Khynnah Skul

Amlarem, Risaw 06: Hato ka lah ban long ba kat ha ka skul sorkar yn nym don nonghikai Chemistry haduh hynñiew bnai.
Hynrei kane ka jia ha ka skul Sohkha Goverment HS School ha kaba kane ka skul kam don nonghikai ha ka subject Chemistry naduh u bnai Lber mynta ka snem.
Kane ka long hadien ba ka Seng KSU War Jaiñtia Circle ka la leit wad jingtip na katei ka skul namar ka jingud jingnam ki Khynnah skul bad ki nong shong Shnong katei ka thaiñ.
Ynda lah tohkit bniah ka Seng ka lap ba naka daw ba ym don nonghikai kadei namar ba une u nonghikai Chemistry u la leit pule B.Ed shuwa namar ka jingbthah ka sorkar.
Hynrei ki nongïalam ka Seng ki pynpaw jingsngewlyngngoh ba kumno ka sorkar ka khlem lah ban bujli ïa katei ka post wat hadien ba lah dep khot ban thep ïa katei ka kam kaba lait, hynrei haduh mynta ym pat shym lah ban thung da kiwei pat.
Ka Seng ka dap da ki jing sngew bitar haba ka jia kumne ïa ki samla pule, khamtam lei lei mynta ka la dei sa ka por ba kin thoh ïaka Pre-Selection bad ka Selection bad ruh ban pynkhreh sa kiwei pat ki eksamin.
Ka Seng ka la kren shai ba lada kine ki Khynnah pule jong kane ka skul kim lah ban ïoh ïaka jing hikai kaba biang kumno ka sorkar kan pyrkhat naka bynta ka jong ki?
Ka KSU ka la ong ruh ba ka sorkar kadei ban shim ïaka jingkitkhlieh bad ruh ban wad ki lad ki lynti khnang ba kitei ki samla pule kin ïoh ïaka jing hikai kaba tikna shuwa ba kin pyn khreh ïalade ban thoh ïa ki eksamin jong ki.