Haduh 266 tylli yn tei thymmai, 1266 yn kyntiew kyrdan ïa ki Anganwadi Centre

Shillong, Risaw 06 : Ka jylla ka la ïoh haduh 266 tylli ki Anganwadi Centre kiba thymmai bad sa 1266 tylli pat kiban kyntiew kyrdan na ki mini anganwadi sha ki Anganwadi kiba heh, pyntip u Myntri ka tnad Social Welfare ka sorkar jylla Bah Paul Lyngdoh ha ka sngi Thohdieng.
Katkum ka jingïathuh jong u Myntri, katei ka jingïoh ka jylla kadei hadien ka jingkynduh jong u dang shen ïa ka Myntri ka tnad Women and Child Development, ka Smriti Zubin Irani dang shen ha nongbah Delhi ban pynsngew ba ka Meghalaya ka dang donkam bun bha ki anganwadi centre.
“Kadei ka khubor kaba sngewkmen ba ngin ïoh kyntiew kyrdan haduh 1266 tylli ki mini anganwadi centre sha ki Centre kiba pura bad ruh ban ïoh thung shuh sa mar iwei iwei i nongtrei bad iwei i nongïarap nalor kiba la don lypa,” ong u Myntri.
Nalorkata, u la pyntip ruh ba ka sorkar ka la rai ruhban kyntiew noh ïa ka jingsiew jong ki nongtrei anganwadi, kata na ka 3500 tyngka shi bnai sha ka 4500 tyngka shi bnai katba ka jingsiew na bynta ki nongïarap pat kan long 2250 tyngka shi bnai nalor ban pynbiang ruh ïa ki uniform bad ruh ïa ki tiar trei nalor ki dawai.
Shuh shuh la pyntip ruh ba yn thung ruh haduh 51 ngut ki Lady Supervisor na bynta kitei ki centre.
Ha kajuh ka por u la ïathuh ba ka jingpynlut na ka bynta kitei ki centre kan long 826.38 lak tyngka, ha kaba ka sorkar pdeng kan long 743.74 lak tyngka bad na ka sorkar jylla kaba dei 10 persen kan long 82 lak tyngka.
U Myntri u la ïathuh ruh ba ki sngew kmen ba ka jylla kan ïoh ban sdang noh ïa ki 266 tylli ki anganwadi centre kiba thymmai ha kaba kin don 266 ngut ki nongtrei bad 266 ngut ki nongïarap.
“La bthah ba ka sorkar jylla kan shim ïa ki sienjam ban thung bad ai jinghikai ïa kine ki nongtrei ha ki centre bad pynïoh ïa ki tiar bad ki jingdonkam baroh bad pyntikna ba kine ki centre kin treikam kloi katba lah,” u la ong.
U Myntri u la pyntip ruh ba lyngba kitei ki centre kin ai shibun ki jingmyntoi khamtam eh ban sam ïa ki jingbam ba tei ïa ki khynnah ba hapoh 8 snem bad ruh ïa ki longkmie ba dang pun khunlung da ka thong ban ïakhun ïa ka jingdon ki khynnah ba duna bam bad bym san.
Kumba long mynta, u Myntri u la ïathuh ruh ba ki jingtip ba ki ïoh lum ka paw ba ka West Khasi Hills kadei ka distrik kaba ki hap ban shimkhia napdeng kiwei ki distrik jong ka jylla.