Pat tip katno ngut ki nong Meghalaya ba sahkut ha Sikkim, pynkhreh ka sorkar ban leit shaw

Da u helpline number pynbna ka sorkar

0

Shillong, Risaw 06 : Haduh mynta ym pat tip satia haduh katno ngut ki paidbah na Meghalaya kynthup ïa ki samla pule kiba sahkut ha Sikkim hadien ba katei ka jylla ka la mad ïa ka jingshah lyngshop kaba jur ha ki bor ka mariang.
Na ka liang u Myntri Sorkar ka jylla ba dei ruh u nongai ktien ka sorkar, Bah Paul Lyngdoh ha ka sngi Thohdieng u la ïathuh ha ki lad pathai khubor ba ka sorkar ka la pynkhreh mardor hadien ba ki la ïoh pdiang ïa ka khubor ba don ki nong Meghalaya ha Sikkim.
“Haduh mynta ngim pat tip katno kiba sahkut (ha Sikkim) hynrei na ka liang ka sorkar ka la shimkhia mardor bad kyrmen ba ha kine ki ar bad lai sngi yn lah ban leit shaw noh,” u la ong.
U la ïathuh ruh ba hadien ba ka sorkar ka la pynbna ïa ki helpline number na ka bynta ki paidbah ba sah ha katei ka jylla ba kin ïoh ïa ki lad jingïarap, ki la don bun bha kiba la ai khublei ïa ka sorkar halor katei ka jingshimkhia jong ka ban phah leit shaw noh ïa ki.
Ha kajuh ka por u la pyntip pat ba ka jingleit shaw ïa kitei ki paidbah kan long katkum ka jingailad ki bor ka mariang namar ki la ïoh jingtip ba bun ki lynti syngkien ki la julor lut.
“Ngin hap ban leit shaw da ka kali tangba lano ngin hap ban pynbeit namar ka lynti syngkien ym pat tip ka long kumno. Na ka liang ki pulit ka jylla ki la ïai bteng ban ïa kren bad ki pulit ka Sikkim halor kaen ka bynta,” u la ong.
Lah ruh ban kdew hangne ba ka sorkar jylla ha ka step sngi Thohdieng ka la pynbna da u helpline number 1800-345-3644 na ka bynta ki nong Meghalaya kiba sahkut ha Sikkim bad ba donkam ïa ki lad jingïarap ban wan phai noh sha ka jylla. Ha kajuh ka por, la pyntip ruh ba na ka bynta ki jingdonkam ba kyrkieh, ki samla pule ki lah ruh ban kren bad ka A. Ali, Additional Director of Higher and Technical Education, ka sorkar Meghalaya lyngba u number 98630 63305 bad ruh ha u Bah FB Ramsiej, Deputy Director Higher and Technical Education, ka sorkar jylla lyngba u number 7005037347.
Lah ruh ban kdew hangne, haduh ka sngi Thohdieng ki la don haduh 25 ngut ki briew kiba la khlad na ka jingshlei um bad sa kumba 143 ngut ei ei kiba dang jah.

Leave A Reply

Your email address will not be published.