Kyrpad ki pulit Ri-Bhoi ban shimti ïa ka met u Watson Kyndait ba khlad ha Shillong Civil Hospital

Nongpoh, Naitung 01: Uwei u briew u ba don hapdeng ka jingshitom kaba jur u la khlad noh ha Civil Hospital Shillong, khlem kino kino ki bahaiing hasem kiba synran ïa u naduh ba u shitom.
Katkum ka kyrwoh na u Superintendent of Police ka Ri-Bhoi District, la ong ba haka 1 tarik Jylliew 2026 haka por kumba 10:30 eiei mynmiet, ki briew bym lah ban ithuh kila leit rah ïa utei u briew ha Byrnihat PHC, namar ka jingshitom kaba jur ryngkat ka jingshitmet, bad namar ba ka jinglong jingman bad ka jingshitom jong u ka la jur bad ym don mano mano ban peit bad synran ïa u, la pynkit noh ïa u sha Civil Hospital, Shillong, ban ïoh jingsumar kaba kham paka hapoh ka jingïalam jong ki pulit.
Hynrei, ha ka 28 tarik Jylliew 2026, ka Police Assistance Booth ha Civil Hospital, Shillong, ka la pyntip ba u la khlad noh ha ka por kumba 9:45 eiei mynmiet katba dang shah sumar. Hadien ba la pyndep ïa ki jingdonkam katkum ka aiñ, ïa ka met utei u rangbah la buh ha jaka buh metiap jong ka Civil Hospital, Shillong.
Utei u briew u dei u ba la tip kyrteng kum u Watson Kyndait, khun jong ka Kong Pyndap Kyndait na Tuber Kmai Shnong, East Jaintia Hills District bad u don ka jing jrong kumba 5 phut 5 inshi.
Ki pulit ki la pyntip ruh ba haduh mynta ym pat don kino kino ki bahaïing kiba wan ban shim ïa ka metïap bad la kyrpad ïa kino kino kiba tip ne ithuh ïa ki bahaïing jong uba la khlad ba kin sngewbha ban pyntip sha Police Control Room (PCR), Nongpoh ha u number 9856084514, khnang ba yn lah ban pyndep ïa ki jingdonkam katkum ka aiñ bad ban aiti noh ïa ka metïap sha ki bahaïing.