Kyrpad ka NTC ban pynsted ban shna ïaka 132 KV Power Sub-Station ha Nongpoh ba jur ka jinglip bording

Nongpoh, Nailar 24: Namar ka jingthud palat jong ka bording elektrik haka thaiñ Nongpoh kaba la buh jingeh ïaki paidbah ba bun ba lang ban pyndep ïaki kam bad kumjuh ruh ki samla pule, ka Nongpoh Town Committee kala mih shakhmat ban pynsngew biang sha ka sorkar halor ka jingdonkam ban pynsted noh ban wanrah ïa ka 132 KV Power Sub Station ha Nongpoh.
“Ka jingbym biang ka bording ilektrik ka ktah naduh ki khynnah skul kiba hap ban pule kot, ki dukan bapher bapher kiba shanñiah ïa ka bording ilektrik na ka bynta ban pynïaid ïa ki kam ki jam, ha kaba ha kane ka juk mynta kiba bun ki kam ki sahkut lut lada ki paidbah kim ioh ïa ka bording ilektrik kaba thikna” ong u Bah Rayonald Kharkamni.
U la ong ruh ba kawei hi ka daw ka jingthud palat ka bording haka thaiñ Nongpoh ka dei ka jingjngai jong ka jaka pynpoi bording sha Nongpoh naduh na Stage III Power Station Kyrdemkulai, ha kaba ka jingjngai ka don kumba 40 km bad kaba dei tang na ka bynta ka 33/11 KV power station, nalor ka jingbym lah ban pynkhuid bha ïaki jaka ïaid jong ka bording namar tang shu thud ka bor mariang ki paidbah kila hap ban shongdum naka jinghap ki dieng ki siej ha lynti.
Namarkata, na ka liang ka Nongpoh Town Committee ka kyrpad ïa ka sorkar lyngba ka tnad MeECL ba kan shim khia noh ban wanrah ïa ka 132 KV Power Sub-station ha Nongpoh bad na ka liang ka Nongpoh Town Committee ruh kan buddien ïa kane ka kam wat ban leit kynduh ïa u myntri sorkar ba dei ka peit ia ka tnad bording khnang ba kane ka 132 KV Power Substation kan urlong noh bad ruh ba ki paidbah ruh kin nym mad jingeh ha kaba ïadei bad ka bording elektrik.