Shillong, Jylliew 05 : Ka kynhun Meghalaya State Volleyball Association (MCVA) hapoh ka jingïalam jong u Bah Sanbor Shullai, MLA, uba dei ruh u President, Bah P T Passah, Working President, Bah KV Kharlyngdoh, Vice President, Bah Gilbert Laloo, Asst Secretary, MSVA bad kiwei ki dkhot, ha ka janmiet sngi Nyngkong ki la leit ban ïakynduh bad aiti ïa ka dorkhas ha u Bah John F Kharshiing uba dei u Working President ka ban kyrpad ban ai jingithuh noh (affiliation) ïa ka jingïalehkai Volleyball hapoh ka jylli treikam jong ka MSOA.
Ha kane ka sngi, na ka liang ki nongkitkam jong ka MSVA ki la ïasyllok bad u Working President ka MSOA ban ïakren halor ka jingai jingithuh (Affiliation) na ka liang ka MSOA ïa ka MSVA khnang ba ka Meghalaya State Volleyball Association kan ïoh ban pynïaid ïa ki kam shakhmat khamtam ba ka Volleyball ka long kawei na ki sport ka ban pynlong ha ka 5th Meghalaya Games ka ban long mynta u snem 2023. Ki nongïalam ka MSVA ki la ïakynduh mynshym taïew ïa u Bah Finely L Pariat uba dei u General Secretary, MSOA.
Na ka Liang u Working President MSOA u la pynsngew ba u General Secretary, MSOA u la pyntip ba ynda ka kynhun MSVA ki la lah ban pynbiang lut ïa ki kot baroh ka office MSOA kin sa leh ïa kaba donkam.
Ha katei ka jingïakynduh la don lang u Bah PB War Nongbri, Asst Director, DSYA bad kiwei. La ïa syllok ruh kumno ka long kaba donkam ban ïoh ïa ka Volleyball Association kaba khlaiñ hapoh ka jylla namar kumba ka paw ki don bun ngut ki nongïashim bynta ha kane ka sports jingïalehkai volleyball.
