Nongpoh, K’lyngkot 14: Ka Seng FKJGP, North Khasi Hills District Unit ka la mih shakhmat ban kyrpad kyrpang na ka sorkar jylla lyngba ka tnad PWD ba kin phai khmat kyrpang ruh ban pyndep syndon ban siang rong na Sohnidan sha Umsiang kaba dei hadien ba ka sorkar ka la dep ban siang rong ïa ka surok ba la sniew naduh na Umsning sha Sohnidan kaba la long ka jingkyrkhu ïa ki paidbah ka thaiñ Mawhati.
Kum ban pynkynmaw, ki paidbah ka thaiñ Mawhati naduh na Umnsing shaduh sha Umsiang ha ki snem ba la leit noh ki la hap shisha ban mad ïa ka jingsyrtok ha ka leit ka wan, kaba dei na ka jingsniew palat ka surok, hynrei dang shen hadien ba ka sorkar ka la mang da ki klur tyngka ban siang rong na Umsning sha Sohnidan, ki shnong ba hap ha katei ka thaiñ ki la mad shisha ïa ka jingkyrkhu ha ka leit ka wan bad kaei kaba dang sahnud ïa ki paidbah ka dei ba ka sorkar ka dang pynsahteng pat na Sohnidan sha Umsiang ba ki paidbah ki dang hap ban mad ïa kajuh ka jingeh ha ka leit ka wan na ka daw ba ym pat siang rong ïa katei ka bynta ba dang sah jong ka surok.
Haba ïa kren bad ki Nongthoh Khubor, u General Secretary ka FKJGP, North Khasi Hills District Unit, u Bah Shanlang Diengdoh, u la ong ba ka seng FKJGP ka ai ka jingkhublei kyrpang ïa ka sorkar jylla lyngba ka tnad PWD, namar wat la ka la dep siang rong na Umsning sha sohnidan kiba bun ki shnong ki la ioh jingkyrkhu ha ka leit ka wan ba la bit la biang ka surok, hynrei haba phai pat sha ki bynta ba dang sahkut ka surok khlem pat da siang rong na sohnidan sha Umsning, kaba dei ruh ka surok kaba pynïasoh sha khpapud Assam ki paidbah ki dang syrtok hi kumjuh ha ka leit ka wan na ka daw ba ka surok ka dang sniew kumba ki la mad jingeh baroh shi katta.
U la ong ruh hooid ka sorkar ka la leh ïa kaba bha tam ban siang rong thymmai naduh na Umsning sha Sohnidan ha ka jingjngai kaba la kot 40 km bad kaei kaba dang sahnud ki paidbah pat ka dei ka jingjngai kaba sa 40 km na Sohnidan sha Umsiang ba ka sorkar ka dang pynsahteng khelm da pyndep ban siang rong ba kum ki paidbah ki dang mad jingeh ha ka leit ka wan ha ki bynta jong katei ka surok ba ym pat siang rong.
Namarkata, kum ka seng ka ai khublei kyrpang ïa sorkar kaba la iohi ïa ki jingeh jong ki paidbah ka leit ka wan na ka jingsniew ka surok ban siang rong thymmai na Umsning sha Sohnidan bad ban ioh mad ki paidbah katei ka thaiñ ba pyndonkam ïa ka surok naduh na Umsning sha Umsaing ka seng ka sngewdei ban kyrpad biang ïa ka sorkar ba kan dang thaw ïa ki lad ki lynti ban siang rong pyndep syndon ha shi lynter katei ka surok khnang ba kum ki paidbah kin ioh mad shisha ïa kata ka jingkyrkhu haba ki la ioh da kata ka surok kaba la bit la baing kumba long naduh na Umsning sha Sohnidan bad haba phai pat na Sohnidan sha Usmning ka surok ka dang long hi kumjuh, u la bynrap.
