Nongstoiñ, Naiwieng 20: Kum shi bynta ban pynkhlaiñ ïa ka party na ka bynta ka election ka ban sa long ha u snem ban wan, ka Hill State People Democratic Party jong ka Rambrai Jyrngam constituency Youth wing jong ka Rimuliang zone, ha ka sngi saitjaiñ ka la pynlong ïa ka jingïalang ha Langpih ha phyllaw jong ka Raidmynsaw Upper & Secondary school, ha kaba ki paitbah na ki shnong bapher bapher jong katei ka thaiñ ki la ïatuid sha katei ka jingïalang.
Ha katei ka jingïalang ba la pynïaid da u bah Ombarly Wanñiang president HSPDP Youth Wing rimuliang zone, la ïadon lang ruh da u samla Pynshai Joel Dkhar Organiser jong ki samla u ba dei ruh u joint secretary ka HSPDP Youth wing central body, u bah D.P. Wanñiang president ka HSPDP Rimuliang zone, u bah Sandondor Ryntathiang president ka HSPDP Youth wing centrel body, bah Khrawpyrkhat Marweiñ secretary ka HSPDP Ribhoi, ka kong Badariti Lyngdoh Nonglait president HSPDP Women wing central body, u bah K.P Pangñiang president Rangbah ka HSPDP central body bad kiwei kiwei.
U bah Pangñiang haba kren ha katei ka jingïalang u la pynkynmaw ba ka HSPDP ka dei kaei ba ki paitbah kin dang ïabeh ban thep vote. Hynrei u la ong ba ka HSPDP ka dei ka party kaba ïeng halor ki nongrim kiba skhem ban pynneh pynsah ïa ka riti, ka dustur, ïa khyndew ka shyiap bad ïa ka hok longtrai jong ka jaitbynriew. U la ong ruh ba lada lada ki paitbah ka thaiñ muliang ki sngew nguh ïa kaei kaba u (L) bah Hopingstone Lyngdoh u la leh, ki dei ban kynmaw ba ki lai tylli ki skul ka Mawdiangsnam Govt LP, ka Langpih Govt L.P ka Umtap Govt L.P, ki dei ki matti kiba u (L) Maieit Hopingstone Lyngdoh u la ai.
U la pynkynmaw ruh ba ha u snem 1963, u (L) Maieit Hopingstone Lyngdoh u la pynrung ïa ki hynriew phew ar tylli ki shnong ha ka electoral roll jong ka United Khasi & Jaiñtia Hills District Council ba kin ïoh ïa ka hok kum ki nongthep vote bad ki nongshong shnong jong ka West Khasi Hills.
U bah Pangñiang u la pynkynmaw ruh ba ha ki snem ba mynshuwa ka Langpih Polling station ka la shah pynkynriah noh sha Mawsikar. Hynrei ha u snem 2016-17 ma u ryngkat ki riew rangbah katei ka thaiñ, ki la ïakhun tyngeh ban pynphai pat ïa ka polling station sha Langpih bad u la thoh da ka shithi haduh ka Election Commission jong ka ri India, ha kaba ka Election Commission ka la mynjur bad ha ka por ba u Arunkumar Kembhavi u long u Deputy Commissioner ka West Khasi Hills, u ba dei ruh u District Election Officer, ba ka Election Commission ka la bthah ïa u ba un mynjur bad leh ïa kaba donkam bad ïa ka Langpih polling stationla lah ban pynphai biang.
Nalor kata u la ong ruh ba kiwei ki party ki ju ong ba ka HSPDP ka kut tang ha Khanapara, hynrei ha une u bnai ban wan ka lama jong ka HSPDP kan jam palat ïa ka Khanapara bad kan poi haduh Delhi ryngkat ki lama jong kiwei pat ki jylla kiba don lang hapoh ka shatri jong ka National Federation of New State (NFNS). U la ong ba yn pynïeng ïa ki ha khmat ka Ïi,ng Dorbar Parliament ha ka por ba ka pynlong ïa ka Dorbar Tlang ban ïa dawa ïa ka Khasi Jaiñtia state ryngkat kiwei pat ki jylla kiba dawa la ki jong ki jylla.
