Nongstoiñ, Naiwieng 20: Ha kaba ïadei bad ka jingthmu jong u Conrad Kongal Sangma Myntri Rangbah ka jylla, ban wan plie ïa ka C&RD Block ha Nonglang ha ka sngi hat majai ban wan, na ka liang jong ka Ophis jong u Acting Syiem ka Hima Nongmynsaw, ha ka jingïakynduh bad ki nongthoh khubor ha ka sngi saitjaiñ ka 19 tarik Naiwieng ha ka ophis treikam jong ka hima ha Langpih, ki la pynpaw ïa ka jingsngewkhia ha kaba ïadei bad ka jingpaw kyrteng jong ka hima ha ka jingkren jong ki riew rangbah kiba la paw ha ki youtube channel halor ka jingpyrshah ban buh ïa ka C&RD Block ha ka shnong Nonglang ba ki la dawa ruh ba dei ban buh ha Tynghor.
U bah Serbilin Lyngdoh secretary ka hima Nongmynsaw u la ong ba na ka liang ka hima kam don bynta ei ei ban pyrshah ïa ka jingplie ïa katei ka Block, namar baroh shi katta kim pat poi pyrkhat ban dawa hynrei ka sorkar ka la wan ai hi. Ha kajuh ka por u la ong ba ka hima Nongmynsaw ka sngew kmen palat bad ka pdiang sngewbha ïa katei ka Block, namar ka jingwan u Myntri rangbah ka dei tang ban wan buh ïa u maw nongrim.
U bah Lyngdoh u la ong ruh ba ki paitbah kim dei ban sngewthuh bakla ba tang mar shu dep bun maw nongrim, ka Block ka la long noh. Hynrei ka lah ban shim por kumba katto katne snem, wat la katta ruh u la kyntu ïa ki paitbah ba kin long kiba ïaishah. Kim dei ban sngap ïa kino kino kiba ïalam bakla, namar ki don shibun bah kiba kwah ban ïoh ïa ka Block kumta lada bakla, ka sorkar ka lah ban ai noh sha kiwei pat kiba don kam.
