Kyntu u Rev. BR Pamshong ban ym beh ïa ka burom briew hynrei ban phai sha ka burom Blei

Nongpoh, Lber 19 : Watla ka don ka jingpynthud na ka jinghap slap kaba la ktah ïa ka jingïaseng Synod Rangbah jong ka Ri Bhoi Presbyterian Synod kaba la pynkut noh mynta ka sngi ha Madan NSCA, Pahamsyiem Nongpoh, hynrei ki bor pynïaid ka Ri Bhoi Presbyteian Synod ki la pynïaid beit ïaid ryntih ïa ka Jingïaseng Synod wat la ka la don ka jingshah pynthud na ka jinghap slap ba bun ki paid riew ngeit kim lah ban ïa poi lut sha ka jingïaseng kata naduh ka jingïaseng mynstep haduh ka jingïaseng noh phai sngi, hynrei ki paid riew ngeit katba lah kila tuid sha ka jingïaseng wat hapdeng ka jingpynthud u slap.
Kum ban pynkynmaw, kane ka dei ka jingïaseng Synod Rangbah kaba 25 ba ka Ri Bhoi Presbyterian Synod ka la kynjoh sha u mawmer ka jingïaid lynti ba 25 snem lane ka jingrakhe ruh ïa kata ka Jubili Rupa kaba la pynlong ha ka Balang Presbyterian Nongpoh, District Khat-ar Lyngdoh Shatei ba hap ha ka Ri Bhoi Shatei Presbytery, haba kane ka jingïaseng ka la sdang naduh ka 15 tarik u Lber 2023 bad la pynkut noh mynta ka sngi ha Madan NSCA Pahamsyiem Nongpoh halor ka phang, “To nangïalam ïangi Ko Kynrad”.
Ha ka jingïaseng mynstep kaba u Rev. D.C Haia u la long u nong sam ïa ka ktien ka jong u Blei bad ban pharia ïa ka ktien ka jong U Blei sha ki hajar ngut ki paid riewngeit ka Balang Presbyterian kiba la wan ban sakhi sha kane ka jingïaseng Synod bad la ioh ruh ka jingrwai pynrhem mynsiem na ka Ri Bhoi Synod Standing Choir, ka jingrwai choir naka RBP Synod Children’s Home, Nongtluh Mathan Presbytery CE .Union, Ri Bhoi Christian Fellowship Shillong, Standing Choir Nongjri, Nongpoh Presbytery( KJP Synod Sepngi).
Haba phai pat sha ka jingïaseng noh phai sngi, u Rev. B.R Pamshong, uba dei ruh uwei na u pastor rangbah ka Ri Bhoi Prebyterian Synod u la long u nongsam ïa ka ktien ka jong u Blei sha ki hajar ngut ki paid riewngeit kiba la shah skhor bad sngap ïa ka ktien ka jong u Blei.
Na ka liang u Rev. B.R Pamshong ha kane ka jingïaseng synod rangbah, u la kren ruh halor ka jingïad lynti ba ka Ri Bhoi Presbyterian Synod ka la kynjoh sha ka jingïaid lynti kaba 25 snem bad dei namar ba kum ki nongïalam ki ieng skhem triang ban da ïa ka burom jong u Blei ka Ri Bhoi Presbyterian Synod ka la dang khie dang san bad ka la dang lah ban ai ïa ka burom sha u Blei.
U Rev. B.R Pamshong u la kren ruh halor ka ‘Burom Blei’ bad ka ‘Burom Briew’ da kaba shim nuksa ïa ka synduk Jutang ha ki khun Israel ba ka burom Blei ka la kyllon noh, dei namar ba la pheil ka jingsynshar hapoh ka Balang.
“Dei lyngba ka jingtrei shitom jong ki lai ngut ki pastor ba kynthup ïa u Rev DR Moksha, Rev. LR Makdoh bad Rev.D.E Syiem bad tang da ki spah ngut ki tymmen basan ba ka Ri Bhoi Presbytery ka la nangsan ha ka jingngeit haki snem bala leit bad ban dang lah ban ai ïa ka burom sha u Blei” ong u Rev. B.R Pamshong, bad bynrap ruh ba ki don kumba 12 ngut ki pastor bad ki tymmen basan kiba la sdang ïaka Ri-Bhoi Synod bad kiba la ïeng skhem ha ka nongrim, ki briew kiba aiti met bad mynsiem bad kiba bat ïa ka jutang ka la pynlong ïa ka Ri Bhoi Presbyterian Synod ba kan lah ban kynjoh sha ka jingïaid lynti kaba 25 snem naduh ba la suit la shor ïa ka Ri Bhoi Presbyterian Synod” u la bynrap.
Da kaba ai mynsiem bad ai jingkyrmen ba ka Ri Bhoi Presbyterian Synod kan dang khiew dan san ha ka jingngeit bad ba kan dang lah ban shakri kham bha ïa ka kam ka jong u Blei, u Rev. B.R Pamshong u la kyntu ïa ki nongïalam bad kumjuh ruh ïa ki paid riewngeit ka Balang Presbyterian ba ngi dei ban pynneh ïa ka burom ka jong u Blei, namar katba ka burom jong u Blei ka dang synshar ka burom briew pyrthei kan nym lah ban lei ei, hynrei lada ngi shim tang ïa ka burom briew, ka burom Blei kan jah noh.
Namarkta, u la pynpaw ruh ba ka burom Blei kaba neh haduh mynta ha ka pyrthei hi baroh kawei, ka dei ka jingshah sahnar phna u Trai jongngi U Jisu Khrist, uba la ngeit ïa la ka mon ka jong u Kpa bad kum ki bangeit ha Trai Jisu ngi dei ban pynkyntang ïa ka burom Blei namar haba don ka burom Blei baroh ki kam ki jam ki ïaid beit ïaid ryntih bad kano kano kaba ngit shakri ruh ka long kaba jop bad shisien ba la jah ka burom Blei la thikna ba ngin kyllon kum ki khun Israel kaba dei na ka daw ka jingbym bing ka jingsynshar hapoh ka Balang, u la bynrap.
Shuh shuh, ha kane ka jingïaseng noh phai sngi la pynphuh pynphieng ruh da ki jingrwai Choir kaba la pynrhem bad ai mynsiem ïa ki paid riewngeit da ka jingrwai Choir naka Balang Presbyterian Nongpoh, Mawbuh Sarikrai Presbytery C.E Union, Ri Bhoi Mihngi Presbytery C.E Union, Standing Choir Mawbuh Ri Bhoi Presbytery (KJP Synod Sepngi) bad na ka RBP Synod Standing Choir.