Ïeng skhem ki paid riewngeit ha phyllaw ïing mane ban shah shkor ïa ka ktien U Blei
Wat hapdeng ka jingpynthut ka Mariang ïaid beit ka Jingïaseng Synod Mihngi (21) ha Nangbah
Jowai, Lber 19: Ka Jingïaseng ka K.J.P Synod Mihngi kaba Ar phew wei (21) kaba la long ha ka Balang Presbyterian Nangbah, Nangbah Nongjngi Hadem Presbytery West Jaiñtia Hills District kala sdang naduh mynta ka sngi 16 tarik kala poi noh noh sha kaba kut mynta ka sngi U Blei 19 tarik halor ka Subject Synod kaba ong “To puh ïa ka khyndew shrah jong phi” Hosia 10:12.
La sakhi ha kane ka Jingïaseng Synod wat hapdeng jong ka jingjur u slap bad ka lyer hynrei ki paid riewngeit da ka mynsiem shitrhem kila wan tuid sha kane ka Jingïaseng Synod ban shah skor ïa ka ktien jong u Blei lyngba ki shakri jong u.
“Na ka daw ka jingjur palat jong u slap naduh hynnin ka sngi ïa ka Jingïaseng kaba la thmu ban pynlong ha madan Synod, la hap ban pynkynriah jaka da kaba pynlong noh ha ka ïing mane jong ka Balang, ha ka jingïaseng shiteng sngi la sakhi ruh ïa ki paid riewngeit kiba la ïeng skhem ha phyllaw ïing mane ha ryngkat ki shatri ban sngap ïa ka khubor na ka ktien u Blei.
Ha kane ka Jingïaseng paidbah ha ka por 10 shiteng mynstep la sam ïa ka ktien U Blei da u Rev. H.S. Dann, katba ki Choir kiab la ai jingrwai ki kynthup na ka Jingïaseng Balang Lumshnong, Jingïaseng Samla Balang Sutnga, Jingïaseng Samla Balang Moodymmai Wah bad ka Jingïaseng Samla Balang Thadlaboh, Jowai.
Katba ha ka por 1 baje shiteng nohphai sngi la sam ïa ka ktien U Blei da u Rev. G.P.L. Gadew, uba la pynsngew ïa khubor ba kum ki khun Khristan ki dei ban long kiba phikir ha ka jingim kaba manla ka sngi bad ban im ryngkat bad u Blei na ka bynta ban ïoh poi sha ka khet jong ka hima ki bneng.
La pynrhem shuh shuh ïa kane ka Jingïaseng da ka jingrwai na ka Choir Jingïaseng Samla Balang Malki, Jingïaseng Samla Balang Shangpung, Jingïaseng Samla Balang Nangbah bad ka Standing Choir Jingïaseng Samla KJP Synod Mihngi, katba ha ka Jingïaseng miet 7 baje u Nongkren halor ka Subject Balang “Ka Balang ka Angkor U Blei ba neh den bad ba skhem”. (Hebru 6:19) da u Rev. (Dr) M.J. Hynñiewta.