Kyntu u MLA ka Jirang ïa ka Sorkar Jylla ban pynkhuid ïa ka lyer jaboh ha Byrnihat

Nongpoh, Lber, 16: U MLA jong ka Jirang Constituency Bah Sosthenes Sohtun da ka mynsiem ba sngewkhia halor ka jingïoh nam ka shnong Byrnihat kum ka jaka ba jaboh tam ka lyer ha ka pyrthei, u la pynpaw ïa ka mynsiem kaba jingkmen hadien ba u Myntri Rangbah ka jylla Conrad K. Sangma u la kular ban shimkhia ïa kane ka kam kaba u la pynpaw paidbah ha ka Dorbar Mang Tyngka kaba dang shu dep long shen.
Kum ban pynkynmaw, u Bah Sohtun u la rah ruh ïa kane ka mat ha ka Dorbar Mang Tyngka kaba dang shu kut shen ban pynpaw ïa ka jingsngewkhia halor ka nam ba ka Byrnihat ka la ïoh ïa ka nam kum ka jaka ba jaboh tam ka lyer ha ka pyrthei, kaba dei katkum ka ka World Air Quality Report 2024 ba la pynmih da ka Swiss Air Quality Technology Company IQAir. Kaba pynkmen ïa u Bah Sohtun kum u nongmihkhmat paidbah ka thaiñ, ka long ba u Myntri Rangbah ka Jylla da lade hi u la pynshai bad u la kular ban shimkhia na ka bynta ban thaw ki lad ki lynti ban pynkhuid ïa ka lyer jaboh ha Byrnihat.
Ha ka jingïakren bad ki lad pathai khubor u Bah Sohtun u la ong ba u ladep aiti da ka jingthoh sha u Myntri Rangbah ka Sorkar Assam ban ïa trei ryngkat ryngkat namarba ha ka thaiñ Byrnihat ym dei satia ba ka jingjaboh ka lyer ka ktah tang da ka lyer jaboh ba mih na ki khrkhana kiba don ha pud u sam ka jylla Meghalaya bad ki don ruh shibun ki karkhana ha syndah ka Byrnihat kiba dei na ka jylla Assam namarba ka Byrnihat ka don ha khappud ka Meghalaya bad ka Assam.
“Nga sngewkmen ba u Conrad Sangma u la kular ruh ba kan don ka jingïatrei lang hapdeng ka Sorkar Meghalaya bad ka Sorkar Assam lyngba ka ‘Joint Action’ ban pynduna ïa ka jingmih ka lyer jaboh da kaba khot ïa trei lang bad ki riewshemphang ha kane ka kam bad kum u nongmihkhmat un jin da la kmen eh ba lada lah ban weng noh ïa kane ka nam jong ka jingjaboh ka lyer naba ka la ktah shisha ïa ka koit ka khiah jong ki paidbah bad ïa ka mei mariang,” ong u Bah Sohtun.
Kum u nongmihkhmat un dang ïai buddien ban pynsted na ka bynta ban shim ïa ki lad ki lynti ban weng ïa ki ka jingeh, la ong u Bah Sohtun bad bynrap ruh ba ka tnad ba dei peit ïa kane ka kam la ka long na Meghalaya bad na Assam ki dei ban shimkhia khamtam ban tehlakam ïa ki karkhana kiba pynmih ïa ka lyer jaboh.
U la ong shuh shuh ba kum u nongmihkhmat u khmih lynti ba ka Sorkar Meghalaya bad ka Sorkar Assam kin ïatrei ryngkat ryngkat na ka bynta ban thaw ïa ki lad ki lynti ban pynduna ïa ka lyer jaboh bad lada ki ar tylli ki jylla ki lah ban weng ïa kane ka jingeh kan long shisha ka jingkyrkhu ym tang ïa ki paidbah ha ka koit ka khiah bad ka long ruh ka jingkyrkhu ïa ka mei mariang.