Kyntu ka Seng Rympei Kyrsiew Jaitbynriew ban jied da ka jingtip briew ha kane ka ilekshon

Shillong, Risaw : Namar ka ilekshon sha ka ïingdorbar assembly ka jylla kala ha thmit, kumta ruh na ka liang ka Seng Rympei Kyrsiew Jaitbynriew (RKJB), Shillong ka kyntu jur ïa ki paralok kiba dei ki nongshong shnong jong ka ri Khasi Jaiñtia ba kin jied ïa ki nongïalam jong ki da ka jingtip briew.
Ka Seng ha u kyrwoh lyngba u Dr J.Syiemlieh Secretary kala ong ba ngi donkam ban kitkhia bha ha kaba ïadei bad ka jingjied ïala ki jong ki nongmihkhmat, namar ki dei ban kynmaw ba ‘kumba ngi jied kumta ngin ïoh,’ bad kan long lehnoei ban babe hadien.
Ha ki por kiba la dep, na ka liang ka Seng kala ong ba kila ud la nam halor ki kynrum kynram ha ka synshar khadar khamtam ha ki kam bam klop.Kiba bun na ki paidbah ki ud ba ki nongmihkhmat ba don mynta kim shym la kitkhia ïa ka jingbit jingbiang jong ki briew ha ki constituency jong ki.
Ka daw tynrai ka long ba ngi la shah thied shah pynbiej ha ka pisa. Kumta ki la hap ban pynmih ïa kaba ki la pynlut shuwa ban pyrkhat na ka bynta ka jingbit jong ngi.
Kumta ruh na ka liang ka seng kala ong ba nangne shakhmat to ngin jied bha ïala ki jong ki nongmihkhmat. Kaba shah thied ka pyntad ïa ka longbriew jong ngi hi.“Ngin da peit bha ïa ki kyrtong da kaba bishar ïa ka jingim babha jong ki, ki kloi ne em ban ïarap ïa kiwei, ki don ne em ka jingpule ba biang, ki lah ne em ban kren hapoh Assembly ban ïasaid na ka bynta jong ngi, ki long ne em ki bym peit niam ne kyntoit, bad ki thrang ne em ïa ka jingbit jong baroh?
Shuh shuh ka Seng kala ong ba ngi dei ban khia ïa la ka hok ba kyntang ban jied ïa kita ki nongïalam kiba dei hok.