Don 5 tylli ki nongrim jingïakhih laitluid ka ri India, ong u MLA Sohra

0

Sohra, Risaw 27: Ka jingpyni dur kaba nyngkong duh halor ka Azadi Ka Amrit Mahotsav bad ki 8 snem jong ka Seva, Sushasan & Garib Kalyan ka la long mynta ka sngi ha ka jaka kaba wan ba ar ha ka jinghap slap ha ka pyrthei kaba long ka Sohra ha Meghalaya.
U Bah Gavin Miguel Mylliem, MLA ka Sohra mynta ka sngi u la plié paidbah ia kane ka jingpyni dur ha Ramakrishna Mission Hr. Sec School ha Sohra. Ha ka jingai jingkren jong u, u la ai jingiaroh ia ki sienjam jong ka CBC Shillong ban pynlong ia kane ka prokram bad u la kyntu ia ki khynnah pule ba kin leit peit ia kane.
U la ong ba ka thong kaba kongsan ban pynlong ia kum kine ki prokram ha kylleng ka ri ka dei ban kynmaw ia ki kam jong kito ki riewkhraw kiba la iakhun na ka bynta ka jinglaitluid bad khnang ba ngin tip shaphang ka deiriti bad ka histori jong ka ri. U la ong ruh ba khlem ka jingkynmaw ia ki kam bad ka jinglenlade kine ki riewkhraw ia la ka jingim kaba la ialam sha ka jingioh jinglaitluid, ngin ym lah ban jam shakhmat.
U la ong ruh ba ka jingrakhe ia ka jingdap 75 snem ka jingioh jinglaitluid ka don 5 tylli ki nongrim – ka jingiakhih na ka bynta ka jinglaitluid, ki jingmut jingpyrkhat kiba thymmai na ka bynta ka roi ka par jong ka ri, ka jingniew ia ki jingjop ha ki snem ban wan bad ki sienjam ban pynurlong ia ki jingkut jingmut jong ki nongshong shnong ka India haba la kot sha u mawmer ka jingdap 75 snem ka jingioh jinglaitluid.
U la ong ba u dap da ka jingkmen ba kane ka jingrakhe ia ka Azadi ka thew ruh ia ka jingpynkhreh na ka bynta ka India ha u snem 2047. U la iaroh ia ka jingbun ki khynnah pule kiba la wan iashim bynta ha kane ka prokram bad u la ong ba ki dei ki khynnah bad ki samla kiba dei ka bor bah jong ka jylla. “Ka dei ka kamram jong ka Sorkar ban pynthikna ba ki khynnah bad ki samla ki ioh mynsiem bad ki ioh ia ka bor khnang ba ki kot sha ki kliar ba ki dei ban poi,” u la ong
U Swami Anuragananda, Secretary, Ramakrishna Mission Ashrama, Sohra ha ka jingai jingkren jong u, u la ong ba ki briew ki ioh shibun ki jinghikai na ka histori bad ki ioh mynsiem ruh na kane. U la pyni ia ki nongiakhih na ka bynta ka jinglaitluid kum ka nuksa ha kaba u la ong ba kine ki shynrang bad ki longkmie ki ai mynsiem ia baroh namar kam pher lada ki wan na ki longiing kiba shem jingeh bha, hynrei ki la don ka bynta kaba khraw ha ka jingpynskhem ia la ka shyiap ka khyndew, ka deiriti bad ka hiar pateng.
“Kine ki briew kilong ka pateng jong ngi, bad ngi donkam ban bud ia ki nuksa kiba ki la ai, ban tip shaphang jong ki, ban ioh mynsiem na ki kam jong ki.” Bad mynta ka sngi, haba phi mih na kane ka jaka, nga thikna ba phin ioh mynsiem shuh shuh ban leh ei ei na ka bynta ki briew bad ka ri jong nga,” u la bynrap.
U la kyntu ia baroh ban ioh mynsiem na ka jingim bad ka kam jong ki nongiakhun jinglaitluid ba khraw bad ba kin ialeh katba lah na ka bynta ka roi ka par jong ka imlang sahlang, ki briew jong ka jylla bad ka ri hi baroh kawei.
Ha kane ka jingpyni dur la pyni ia ka jingiakhun jinglaitluid jong ka ri ha ki rukom bapher bapher. Ki bynta ba kongsan jong ka jingiakhun jinglaitluid ba la pyni ha ka exhibition kilong – Revolt of 1857, Non- Cooperation Movement, Champaran Satyagraha, Kheda Satyagraha, Dandi March lane Namak Satyagraha, Azad Hind Fauj, Quit India Movement, ka jingphiah ia ka ri bad shibun kiwei kiwei. Ka la don ruh ka bynta ba kyrpang ba la pyni ia ka jingnohsynniang ki nongiakhun jinglaitlaitluid na ka thain shatei lammihngi.
La aiti ia ka bynta ba kyrpang ha ka jingpyni dur sha ka 8 snem jong ka Seva, Sushasan, Garib Kalyan ha kaba la pyni ia ki jingjop jong ka sorkar ha ki bynta bapher bapher ha ki 8 snem ba la leit, kynthup ha ka thain shatei lammihngi.
Kiba la iadonlang ha kane ka jingialang kilong, Dr Engam Pame, Director, CBC, Shillong, Dr Moushumi Dey, Nonghikai na ka Dept of History, Women’s College, Shillong kum ka Resource Person kaba la kren halor ‘ki riewshlur ki bym shym la paw pyrthei jong ka jylla Meghalaya’, ki Executive Member jong ka Dorbar Khliehshnong, Sohra, ki nonghikai, ki samla pule bad kiba shah khot sngewbha.

Leave A Reply

Your email address will not be published.