Shillong, Nailar, 07: Ka Indian Institute of Public Health Shillong (IIPHS) ka la kyntu ïa ka tnat Pule Puthi jong ka Sorkar Jylla ban pyndam noh ïa ka hukum ba la pynmih ha ka 7 tarik, Naitung, kaba bthah ïa kane ka Institute ban pynsangeh noh mardor ban pynrung klas na ka bynta ka Post Graduate Programme ha ka Masters of Public Health (MPH) da ka jingïatreilang bad ka Martin Luther Christian University (MLCU).
“….ngi ïaiban ba ka jingthoh ha ka shithi kaba 7 tarik, Naitung, 2022 kan pynduhnong ïa ka jingpawkhmat jong ka IIPHS. Namarkata, la kyrpad ïa phi ban pyndam/weng noh ïa kane ka shithi kham kloi,” ong ka Director jong ka IIPHS & IIPHS Society Member Secretary ka Prof Sandra Albert ha ka shithi ba la phah sha u Deputy Secretary in-charge Education u Bah D. Lyngdoh ha ka 3 tarik, Nailar.
Ka Prof. Albert ka la pynpaw ïa ka jingkyndit haba ka tnat ka Koit ka Khiah jong ka Sorkar Jylla ka la dawa ïa ka jingpynshai lyngba u kyrwoh, katba kawei pat ka tnat treikam jong ka Sorkar ka la pynmih da kane ka hukum ha ka 7 tarik u Naitung.
U Deputy Secretary u la phah ruh ïa kane kajuh ka shithi sha baroh ki Private University ban bthah ïa ki ban ym pynïasnoh bad kino kino ki Institutions/College, hynrei lym kymta ïa ka Degree yn ym ithuh satia da ka Sorkar Jylla bad ka Meghalaya Private Universities Regulatory Board (MPURB).
Ka tnat Pule Puthi ka la kyrpad ruh ïa ka Directorate of Information & Public Relations (DIPR) ban pynmih da ka jingpynbna ha ki kotkhubor ba ki Private University hapoh ka Acts of Meghalaya kim donbor ban pynïasoh bad kino kino ki College/Approved College/Cutonomous College.
Shuh shuh ka tnat Pule Puthi ka la pan ïa ka jingtip kaba bniah halor ka jingïapynbeit ba shipor “interim arrangement” hapdeng ka IIPHS bad ka MLCU na ka bynta ban pynlong ïa ki eksamin da ka Meghalaya Private Universities Regulatory Board (MPURB).
Ka la kam ruh ba ka IIPHS ka tip bha ïa ki kyndon jong ka jingmana kaba pyrshah ban pynïasnoh ba la pynlong da ki Private University katkum ba la kdew ha ka Meghalaya Private Universities (Regulation of Establishment and maintenance of Standards) Act, 2012 (MPU Act).
Haba pynpaw ba ka IIPHS kam ju pyrkhat ban ïapynbeit ïa ka jingpynïasnoh bad ka MLCU ka Prof Albert ka la ong, “kaei kaba pynlong ïa ka IIPHS-PHFI bad MLCU ban pynïasnoh ka long katkum ka Memorandum of Understanding kaba la ïasoi ha ka 25 tarik, Kyllalyngkot, 2018, ha kaba ka la don ka jingïamynjur na ka bynta ka jingmyntoi, ha kaba ka IIPHS bad ka MLCU kin ïatreilang na ka bynta ka bha ka miat jong kiba bun balang.”
Ka la ong ba ka shwa ban ïasoi ïa ka MoU, ka IIPHS-PHFI ka la bishar bniah ïa ka MLCU Act, 2005, ryngkat bad ki kyndon (Statute and Rules) jong ka MLCU.
Ka la ong ba ka MLCU Act, ha ka Section 7 (c) ka shah ïa ka MLCU ban ïatreilang bad kiwei kiwei ki shlem ai jinghikai bad ïa ki jaka hikai ha ka tnat ka koit ka khiah, bad ka sorkar bad ki kynhun trei mon sngewbha ban ai ïa ki jinghikai bapher bapher ha ka pule ka puthi.:
Shuh shuh ka la ong ba ka Section 8 (xix) ka shah ïa ka MLCU ban ïatreilang bad kiwei kiwei ki kynhun ha kaba ïadei bad ka Pule Puthi……ha kaba ïadei bad ki Professional Courses jong ka Science bad Health Sciences…”
Ha ka jingpynshai ba la pynmih ha ka 3 tarik, Jylliew, u Principal Secretary ka tnat ka Koit ka ka Khiah, u Sampath Kumar u la kdew ba ïa ka Masters of Public Health (MPH) degree yn ym lah ban ai da ka IIPHS hynrei da ka Martin Luther Christian University (MLCU).
Ïa ki samla pule la ai jinghikai da ki nonghikai jong ka MLCU bad ka IIPHS.
U Kumar u la pyntip shuh shuh ba kine ki jingïapynbeit ha kaba ïadei bad ka pule ka puthi la ai jingbit da ka UGC, ka MLCU Act 2005, ba la kdew ha ka Chapter II clause 7(c) bad clause 8(19) bad da ka rai jong ka IIPHS Society.
Haba pynpaw ïa ka jingïatreilang bad ka MLCU ba ka dei tang ka jingïapynbeit ba shipor, u Principal Secretary u la ong, “ka kyrdan jong ka University ka donkam ban ai ïa ka Degree, namarkata, ka jingïapynbeit ba shipor bad ka IIPH lem bad ka MLCU ryngkat lang bad ka NEIGRIHMS, da kaba ïatreilang bad ka NEHU na ka bynta ban ai ïa ka Medical Degree.”
