Kyntu ka Hynñiewtrep Youths Council ïa ka Sorkar Jylla ban plie Sub Centre ha ka shnong Wahlyngdoh

By Mawphor News Desk On May 7, 2023

Nongstoiñ, Jymmang 6: Ka shnong Wahlyngdoh ka dei kawei ka shnong kaba don ha mars hiteng lynti na Nongstoiñ bad sha Maweit ha kaba ka jngai kumba 20 kilometer. Ka jingdon ki tnum ïing ka long kumba 60 ha ryngkat ka jingbun paid kaba 300 tam, kata haba kheiñ kyllum lang baroh naduh khunlung haduh ki tymmen ki kro bad ka don ka Wah hajan bad ka Mariang kaba itynnad
Kane ka shnong ka don ha mar pdeng jong 20 tylli ki shnong ha ka jingbun briew kumba 8000 ngut, kata haba kheiñ kyllum lang na baroh ki 20 tylli ki nongshong shnong. Pynban kaba sngew lyngngoh ka long ba tang ka sub-centre ka ban ai ka jingïarap ïa ki long kmie kiba armet, ki khunlung bad ki tymmen ki kro kiba pang kiba shitom ha ka ban pynïoh ïa ki dawai dasin, kam pat don haduh mynta mynne.
U President ka HYC Wahlyngdoh Area Unit u samla Lambha Rongrin ha ka jingïakren bad u nongthoh khubor halor kane ka phang, u la ong ba ka jingbym don ka sub-centre ha ka shnong Wahlyngdoh ka wanrah shibun ki jingeh kiba ïa dei bad ka koit ka khiah ki paidbah.
U la ong ba ha ka jingshisha, ka jingbun paid ruh la biang bha, namar katkum ka jingdawa ka sorkar ban ïoh ïa ka sub-centre ka dei ban don 3000 ki jingbun briew ha ki shnong kiba markhap. Hynrei na ki 20 tylli ki shnong, ka jingbun briew ka la palat ïa kata, pynban ka sorkar kam ju phai khmat sha kane ka dong ka thaiñ ban buh noh da ka sub-centre.
U la ong ruh ba dei halor ka jingbym phai khmat bad ka jingleh klet ka sorkar, ba la pynlong ia ka HYC Wahlyngdoh Area Unit ha ka jingïalam u President Lambha Rongrin, ryngkat ka jingdonlang ki nongïalam jong ka Circle bad jong ka West Khasi Hills, ki la leit ban ïakynduh ïa I DM&HO Nongstoiñ ban dawa ïa ka sub-centre ha Wahlyngdoh.
U la ïathuh ba na ka liang I DM&HO, I la kular ban shimkhia halor kane ka jingdawa jong ka seng ban wanrah noh ïa ka sub-centre ha ka shnong Wahlyngdoh, ban ai ka jingshakri jong ki 20 tylli ki shnong kiba hap ha katei ka thaiñ.
Na ka liang ka seng ka sngew dei ruh ban kyntu lem sha u MLA ba thymmai jong ka dong Bah Methodius Dkhar, ba un sngewbha ban shimkhia halor kane ka mat kaba kongsan na ka bynta ka jingbit jingbiang ka koit ka khiah ki paidbah.
Ka HYC Wahlyngdoh Area Unit, ka dawa ruh na ka sorkar jylla ban kan shimkhia ban pynkloi ban buh noh ïa kane la sub-centre, khnang ba kan pynsuk bad kan pynim ïa bun ki paidbah jong kine ki 20 tylli ki shnong, ym shuh ban dang ïap lynti kumba la jia baroh shikatta bad ka seng kan sah buddien ïa kane haduh ban da urlong.