Hato dang don jingkyrmen ban ïohi ïa ka jingitynnad!

0

Haba ngi peit sha ki jingkhapngiah palat jong ka sor Shillong ha kine ki sngi, sngew kumba ong ba ym don jaka ne lad kamai shuh da kiwei pat ha ki shnong ki thaw, ne ha ki thaiñ nongkyndong dei na kata ka daw ba baroh ki la wan ban tuid lut sha sor bad pynkhapngiah ïa ki lynti ki syngkieng, ki ïew ki hat, ki surok bad lynti bah ruh kumjuh. Hooid shisha ym lah ban len ba ïa mynta hi la i jwat ban weng ïa kane ka jingkhapngiah bad ka daw baroh ka dei hi na ka jingbakla jong ka sorkar naduh kaba sdang. Kawei na ki daw kiba kongsan eh ka long na ka jingshim kabu jong kito kiba don ha ki kam politik ba ha ka jaka ban thaw ïa ki lad ki lynti kumno ban plie lad ïa kito kiba die madan ki nangpynskhem pynban ïa ka nongrim jong ki, kat haduh ban ïeng ruh da ki aiñ bapher bapher ban buh jingeh kylla wat ha ka sorkar.
Kumba ka long mynta la thikna ba ka sorkar kam lah shuh ban pynkhuid pat ïa ki lynti ki syngkieng na ka jingshlei jong ki briew kiba shong die madan, namar ka ïing bishar hi ka la dep ban pynksan ia ki. Hynrei ka sorkar kam dei ban shu kut noh kumta, pynban ban ïai wad ïa ki lad ki lynti ban thaw ïa ki ïew ki hat bad ka long kaba donkam ban peit ba ki trai jylla kiba dei ki trai shnong riewlum kin ïoh ïa ka jingpyrkhat ba kyrpang na ka sorkar ban ïoh ïa ki basa ban ïahap dur bad ïahap dor na ka bynta jong ki. Hadien jong kane ka sorkar ka donkam ban pynbna noh kum ki ‘no Vending Zone’ ne ki jaka ba ym lah ban die madan ha kiba bun ki jaka ka nongbah Shillong. Ka sorkar ka dei ban pei shkor ban ym ïalehkai shuh bad ka lawei jong ka imlang sahlang hynrei ka donkam ban pyrkhing bha ban ym ailad shuh ba kane ka nongbah kaba la tip mynnor kum ka Scotland jong ka ri mihngi kan lip noh syndon ïa ka rong bad ka burom jong ka.
La ïohi ba wat la ka sorkar ka la ïaleh katba lah wat ban thaw ïa ki lad ki lynti naka bynta ki samla ba la nang la stad ban ailad ïa ki ban trei ha ki kam la jong da kaba ailad ba kin wai ïa ki dukan kum ha ki Complex ne basa sorkar, hyrnei kaba sngewsih pat ka long ban ïohi ba ïa kine ki dukan la wai kylla da ki briew kiba nabar. Kane hi ka pyni ba kito ki briew kiba ïoh ban wai dukan ki la don da kiwei pat ki kam kiba khambha ban trei na ka bynta ïalade. Ha ka jingshisha la dei ban aiwai ïa kitei ki dukan jong ki tang sha ki trai jylla hi wat la ki siew ia ka dor kaba kham duna ruh bad kane kan long ka jingïarap ïa ki para trai shnong bad ruh khanglad ïa ki briew kiba nabar ban phrung khlieh ha kane ka bri u Hynniewtrep.
Kumba ka jingdawa ïa ka ILP ka dang ïaid shaphrang bad kumba long hi wat na ka liang jong ka sorkar jylla ruh kala dep ban mynjur bad mynta ka shong sa ha ka sorkar kmie ha Delhi. Ngim lah ban peit tang sha ka sorkar ban leh ïa kiei kiei kiba donkam, hynrei kum ki nongshnong ka jylla bad ki trai shnong ngi donkam ban don ïa ka jingsngew kitkhlieh ban leh ei ei ban ïada na kaba plie lad laidlan ïa kiwei pat ki jaidbynriew heh paid, katba ïa ki para khasi pat ki ia khñoit beiñ ia ki. Kane ka long kaba shisha bad ngi sakhi ïa kata ba wat tang hapoh Iewduh ruh kiba bun ki dukan Khasi la shongsyaid lut da ki briew kiba nabar bad ki trai shnong ki hap ban shu thynñian khapngiah ha madan.
Ka la dei ka por ban pynïoh ïa ka jinghikai kaba khlaiñ sha ki nongshongshnong jong ka jylla Meghalaya, khnang ban pynlah ïa ki ban bat ïa la ka hok bad ban kot ka bor pyrkhat. Namar ba kumba ka long mynta sngew ban ong ba ki trai shnong wat la ki don ïa ki dukan kiba biang hynrei kin jied ban shong die ïalade ha madan bad aiwai ei ïa ka dukan la jong sha ki bar jylla kiba siew ïa ki ia ka baiwai kaba heh! Hynrei ka long kaba donkam ban don ïa ka jingpyrkhing ban aiwai beit tang sha ki para jaidbynriew khnang ban khanglad ïa ki briew kiba nabar kaba lah ban tap lut ïa ki riewlum ri paid ka bri u Hynniewtrep. Lada baroh ki briew kiba die madan kin dei tang kiba nabar suda kan khamsuk shibun wat ia ki bor sorkar ban pyntreikam ia ka aiñ bad khanglad ïa ki ?

Leave A Reply

Your email address will not be published.