Ahmedabad, Jymmang 06 : Ka Mumbai Knights FC ka la wanphai da ka jingjop hadien ba ka la shah thep kol nyngkong ban pynliem ïa ka Sports Odisha da 2-1 ha ka lympung ïalehkai Indian Women’s League (IWL) 2023 na ka Group A ha ka jingïalehkai ha ka sngi Saitjaiñ ha Transstadia.
Da kaba mad nam rem ha ka jingïalehkai kaba nyngkong hakhmat ka East Bengal kaba la long ha ka sngi Palei, ka Mumbai Knights ka la shim por 48 kynta ban wanphai da kaba khur jingjop na ka jingmad nam rem da 4-2 kol.
U Head Coach jong ka kynhun u Rutuja Gunwant u la pynbeit pynmih madan da 4-3-3 ha kaba la pynap kol ïa ka Kashmira. Ka Pranita, Ritu, Afreen bad Mansi ki la ïeng lang ha ryngkat ka Pranita bad Mansi kum ki fullback.
Ka Velanie, Karen bad Sushmita ki la ïalehkai hapdeng ha ryngkat ka Karen. Ka Alexandra, Karishma bad Priyanka ki ïalehkai shakhmat (forward).
Baroh ar ki kynhun ki la sdang da kaba ïalehkai bha bad ïa ñion mar kylliang, kumba baroh ar kidei ki kynhun kiba mad nam rem ha ki jingïalehkai sdang. Ka Sports Odisha ka la smiej ïa ka Mumbai Knights FC namar ba ka la shah rem da 4-2.
Hynrei ka la buh hapdeng ka umdum ïa ka Mumbai Knights ha kaba ka la shah lam khmat hadien ba ka Anju ka la ïoh ban thep ïa ka shi kol na ka bynta ka Sports Odisha ha ka minit ïalehkai ba 34 minit.
Ka Mumbai Knights ka donkam ban pynphai kylliang bad ka la ïoh shisha hadien ba ka Ritu Rani ka la thep ïa ka kol pynïakhaid da 1-1 hashuwa ban kut ka kylla step.
Lyngba katei ka kol bala ïoh thep, ka Mumbai Knights ka la nang khlaiñ bad ka la lah ban ïalehkai bha ha kaba sdang jong ka kylla miet bad ka la ïoh ka kabu thep kol lyngba ka penalty.
Ka Karishma kaba la shim ka jingbahkhlieh ïa ka jingshut penalty, khlem da pynlehnoh ei ka la pynrung suk ïa ka bol hapoh ka jar ha kaba ka kynhun ka la tam da 2-1 kol.
Ka Mumbai Knights ka la pynkylla arngut ki thei ïalehkai ha kaba ha jaka jong ka Alexandra la mih bujli da ka Namrata Thakur ha kaba sdang jong ka kylla miet bad ka Namrata ka la rung ha ka jaka jong ka Janhavi Shetty ha ka minit ïalehkai kaba 90.
Sa kawei pat ka jingïoh khur ïa ki lai point, ka Mumbai Knights ka la khur ïa ka jingjop kaba laisien na ki sansien ïalehkai. Mynta ka Mumbai Knights ka khur 10 point na ki sansien ïalehkai, bad duna lai point na ka Gokulam Kerala FC kaba la pynliem kut da14-1 kol pyrshah ïa ka Kahaani FC.
Ka Mumbai Knights ka ïoh mynta sa ar sngi ban pynkhreh na ka bynta kawei pat ka jingïalehkai, kata kan sa wanphai biang ha ka sngi Ba ar ha kaba kan sa aireng pyrshah ïa ka HOPS FC ha Shahibaug Police Ground.
