Jowai, Jylliew 27: Ka Hynñiewtrep Integrated Territorial Organisation (HITO) Jowai Circle, ha ka jingleit jurip ïa ka MCH Hospital, Panaliar Jowai ka la lap ba kane ka jaka sumar ka dang don hapdeng ka jingduna jong ki nongtrei naduh ki Doctor, ki Nurse bad ha kiwei de ki bynta kiba ïadei bad ka jingsumar ïa ki nongpang.
Kumta halor kane ka jingduna nongtrei na ka liang ka HITO hapoh ka jingïalam jong u Secretary Bah Deibormi Siangbood, ha ka 26 tarik mynta u bnai, ki la leit ban buh da ka Memorandum sha u District Medical & Health Officer (DM&HO) jong ka West Jaiñtia Hills District bad la phah kopi sha u Deputy Commissioner ka West Jaiñtia Hills District kumjuh sha u MLA ka Jowai u Bah Wailadmiki Shylla, ban shimkhia halor kane ka jingdonkam jong katei ka Hospital.
Na ka liang ki nongïalam ka HITO Jowai Circle kila pynpaw ba kin sa leit ban ïa kynduh ruh ïa ka Myntri ba dei peit ïa ka koit ka khiah jong ka Jylla ha kine ki khyndiat sngi ban dawa ïa ki jingdonkam ba kyrkieh jong katei ka jaka ai jingsumar nalor kiwei de ki jingdawa ba donkam.
