Mairang, Jylliew 27: Ka ophis treikam ka District Social Welfare Officer, West Khasi Hills ha ka jingïatreilang bad ka ophis u Superintendent of Police Eastern West Khasi Hills District bad ka Sankalp Hub for Empowerment of women Beti Bachao Beti Padhao, ki la pynlong ïa ka jingpynsngewthuh paidbah khamtam ïa ki khynnah skul bad ki samla, shaphang ka jingsniew jong u drok bad ka jingkynrei ha ka jingkhaïi beaiñ ïa u ne u jingdih.
Kane ka prokram la pynlong ha Mairang Presbyterian Higher Secondary School katkum ka phang, ‘ka jingpyndkut noh ïa ka jinglong kyrni, ki lad ban ïada, ka jingshah sumar bad ka jingim ba thymmai na ka bynta ïa baroh”.
Kiba donlang ha kane ka sngi ki kynthup ïa ka Deputy Commissioner Kong A. Kharpor kum ka kongsan, u Superintendent of Police Bah D. Khyriem, Additional S.P Bah P. Suchiang bad u rang ïalehkai phutbol ba pawnam, Bah Samuel J.Lyngdoh Kynshi.
Ka Deputy Commissioner Kong Anita Kharpor haba ai jingkren, ka la pynpaw ïa ka jinglong donkam eh ban ïashimbynta lang ha kane ka sngi ïa kaba la tip kum ka sngi pyrshah ïa u jingdih ba sniew u drok.
Ka la ong une u jingdih u la ktah ïa ki longïing longsem bad ka imlang sahlang ha ka pyrthei salonsar, kynthup ïa ki district bad ki shnong. Ka la ban jur ba ka la dei ka por ban shim ïa ki lad ki lynti kumno ban pynbha pat ïa kito kiba la kyrni bad kiba la kwah shisha ban lait noh na u ne u jingdih, ban ai mynsiem ïa ki ban iehnoh ïa u ne u jingdih ym ban pynrem ïa ki.
Ka long kaba donkam ban ïatreilang ha ka ban ïakhun pyrshah ïa u ne u jingdih bad ruh ban ïada ïa ki khun samla ha ki shnong ki thaw na ka jingshah pynngop ha u drok.
Ha kane ka sngi la kynthup ruh ïa shibun ki program kum ka jingïaid rally pyrshah drok, ba la shim bynta da ki khynnah skul, ka jingsam ïa ki khusnam sha ki nongjop jong ka jingthoh slogan, dro dur, ka jingïakob thoh poitry bad ki dur khih lyngkot, da ka pisa bad ka syrnod.
