Kyntu ka DC jong ka West Khasi ïa ki nongleit nongwan ban husiar ha kine ki por aïom slap

Nongstoiñ, Naitung 14: Namar ka jingbym thikna ha ka jinglong jignman jong ka mariang ka Kong Anita Kharpor IAS Deputy Commissioner (DDMA), Eastern West Khasi Hills District ka la bthah ïa ki nongleit nongwan sha ki jaka shangkai suwari hapoh ka district ba kim dei ban leh ïa kiei kiei ki bymdei ban leh khamtam ha kane ka aiom slap. Ïa kane ka jingbthah la pynmih mamar ka jingjur jong u slap kaba lah ban wanrah iaka jingtwa ki lynti syngkien, kaba lah ban don ka jingshlei um bad kiwei kiwei ki ba lah ban shah ktah na ka ne ka aïom slap.
Ka Deputy Commissioner ka la bthah ruh ia ki nongshangkai suwari ba ki dei ban phong ïa ki jaket kiba lah ban ai jingïada (Life Jacket) bad phikir bha haba leit sha ki bynta ba don um, lane shong lieng ne kino kino ki jingïalehkai ha ka um. Nalor kata ka la bthah ruh ba ki dei ban bud ïa ki dak jingïada bad ki jingbthah ba la buh da ki bor pynïaid. Kim dei ban leit rung sha ki jaka ba la mana ne kiba don jingma, ym dei ban leit marwei sha ki wah, pung ne ki jaka ba jur ka jingïaid ka um.
Ha kajuh ka por ka la bthah ruh ba ki dei ban peit bha ïa ka jinglong ka suiñbneng shuwa ban leit sha ki jaka jngohkai, ki dei ruh ban sumar bha ïa ki khynnah bad kim dei ban iehnoh marwei ïa ki. La kyntu ruh ia ki nongshangkai suwari ba ki dei ban sumar ïa ka mariang ban leh khuid bad ban kiar na kaba bret pathar ïa ki jaboh kum ki plastic, bilor um, bilor kyiad kiba pynjaboh ïa ka mariang bad ki bym pyut satia.
La bthah ruh ba ha ka por ba jur slap, jur lyer ne don jingma na ka jingtwa khyndew, dei ban mih noh mar mar na ki jaka ba ki don. Ki dei ruh ban kohnguh bad bud ïa ki jingbthah jong ki bor shnong, ki nongïalam shnong bad ki bor sorkar. Ki dei ruh ban burom ïa ka kolshor bad ki riti dustur jong ki shnong ki thaw bad ka thaiñ. Lada don kano kano ka jingjia ba kyrkieh ne kiba don kam ïa ki jingïarap ba kyrkieh ki dei ban phone ha u number 112. Kumta la kyrpad ïa ki paidbah ba ki dei ban khmih ïa ki jingmaham ba la pynmih na ki bor Distrik bad na ka IMD.
Na ka liang ka DDMA ka la bthah ruh ïa baroh kiba leit sha ki jaka jngohka ba kim dei ban pynjulor ia ki mawbynna/mawkyrteng/ ki tiar lane ki kynja jingthung lane kdiah/pruid/thoh, ne pynsniew ia ki mar ki mata paidbah. Yn ym shah ruh ba kin rung sha ki jaka ba la khang ne ba don jingma lane ban pynsawa than ia ki jingtem jingput ne pynwit ia kiwei pat. La khang ba kim dei ban ai bam ia ki mrad khlaw ne pynthut ia ki jaka shong jaka sah jong ki. Nalor kata la khang ruh ba kin ïa dih kyiad ne kiwei pat ki jingdih pynbuaid ha ki jaka ba la maham bad khang pyrshah. La mham ruh ba kim dei ban iaid marwei ha ka por miet ne ha ki jaka ba long kynjah. La kyntu ïa ki nongshangkai suwari ba kim dei ban leit kiew sha ki maw lane ki riat kiba syntuid ban lait na ki jingmynsaw. Lada don kino kino ki jingjia kiba ki donkam kyrkieh ia ka jingiarap ki lah ban pyntip mar mar ha kine ki number: District Disaster Management Authority (DDMA):- 08974579811/9485005523, District Control room Telephone No.:- 03657-282254/1077, Emergency Helpline No:- 112, Police Control Room:- 7629981814 bad sha ki BDO jong ki Block.