Khliehriat Naitung 14: Ha East Jaiñtia Hills District, naduh ka 14 tarik u Kyllalyngkot, 2026, la sam haduh 87,322 tylli ki Enumeration Form ha baroh kawei ka district bad haba la kheiñ kyllum kaba long 83.63% na ki nongthep vote ki dei kiba la dep ioh pdiang ïa ka phorm.
Ka Special Intensive Revision (SIR) – kata, ka Jingkheiñ briew ka la sdang naduh ka 30 tarik ïaiong, 2026, ha ki ar tylli ki Assembly Constituentcy jong ka East Jaiñtia Hills District, ïa kane la pynlong katkum ka jingbthah jong ka Election Commission jong ka Ri India ban pynthikna ïa ka jingpynkhreh ïa ka thup kyrteng nongthep vote kaba thikna bad kaba khlem jingbakla.
Katkum ka kaiphot ba la phah lyngba u Deputy Commissioner ka East Jaiñtia Hills District, ka jingiaid shaphrang jong kane ka ka kam ba ïadei bad ka jingsam ïa ki Enumeration Form, ka long ba ha ka 5- Sutnga Saipung Constituency (ST) AC- – 90.42% bad ha ka 6-Khliehriat (ST) AC – 76.90% .
U District Election Officer, East Jaiñtia Hills u la kyrpad ïa baroh ki nongthep vote ban ai ïa ka jingiatreilang naduh ka dohnud bad ki Booth Level Officers (BLO) ha kane ka Jingkheiñ kyrteng kaba dang iaid shakhmat. La kyrpad ïa ki nongthep vote ban pyndap bad aiti ïa ki Enumeration Form jong ki hapoh ka por ba la buh khnang ban pynsuk ïa ka jingpynrung kyrteng kaba long kaba thikna ha ka thup kyrteng ki nongthep vote.
Ban peitngor ïa ka jingpyntreikam kaba ïaid beit ïaid ryntih bad kaba paka, la pynbeit ïa ka SIR Help Desk ba kyrpang ha ophis jong u Deputy Commissioner, East Jaiñtia Hills District. Ki nongthep vote kiba wad jingtip, jingiarap, lane jingpynshai ha kaba ïadei bad ka SIR ki lah ban leit sha ka Help Desk, kiba hap hapoh ka 5-Sutnga Saipung (ST) ki lah ban phone ha u number 9774778462 (kong Syrpai Tlang) bad ha u number 8601896445 ( bah Watsngew Syrti).
Kiba hap hapoh ka 6 Khliehriat ki lah ban phone ha u number 6909512571 (bah Sardonik Lyngdoh) bad u number 8414803997 ( Bah Ewanmi Dkhar).
