Sdang ka MACS ïa ka jingïaid pynsngewthuh paidbah halor ka jingpang HIV/AIDS ha Jowai

Jowai, Naitung 14: Ka Meghalaya AIDS Control Society mynta ka sngi kala plie paidbah ïa ka “Roadshow Awareness” ha West Jaiñtia Hills District ha ka jingïalang bala pynlong ha Ummulong Stand, Iawmusiang Jowai da ka jingthmu ban leit pynsngewthuh sha ki paidbah nongshong shnong halor ka jingpang HIV/AIDS bad ban kyntiew ïa ka jingtip ha kaba ïadei bad koit ka khiah.
Ïa kane ka roadshow la plie paidbah da ka Emelya Ch. Momin, MCS, Assistant Commissioner kum u Kongsan. Ha kane ka sngi la ïa donlang ruh ka Dr. Patricia Shylla kaba dei ka District Medical & Health Officer (DM&HO), West Jaiñtia Hills ha ryngkat ki ophisar na ka tnad ka koit ka khiah bad na ka MACS.
Ka jingthmu jong kane ka Road Show ka long kum ka lad ban pynsngewthuh paidbah shaphang ka jingpang HIV/AIDS, ki jingpang ba bit na ka jingshongkha shongman pathar, ha ka juh ka por yn pynshlur ïa ki paidbah ban wan shakhmat da kaba leh ïa ka test HIV khlem kano kano ka jingsiew haki jaka sumar sorkar kiba don ha kylleng ki jaka.
Lyngba kane ka prokram ïaid surok ki paidbah kin ioh jingtip khambniah shaphang kane ka jingpang HIV bad ban ïoh ïa ki test kum ka lad jingïada.
La kyntu ruh ba ym dei ban ñiewbeiñ ïa kiba don ïaka jingpang HIV hapoh ka imlang ka sahlang hynrei dei ban don ka jingïaburom markylliang.
Shi bynta na kane ka prokram lyngba ka ‘Blackbox mobile awareness vehicle’ kan ïaid ha kylleng ka West Jaiñtia Hills District bad sha kiwei de ki District ha ki taïew ban wan, ban peit bniah ïa ka jingpang HIV/AIDS da kaba wanrah ïa ki jingtip ba kongsan sha ki paidbah nongshong shnong.