Nongstoiñ, Naitung 12: U Deputy Commissioner (DDMA), Eastern West Khasi Hills District ka la pynmih ïa ka jingbthah na ka bynta ki nongleit nongwan sha ki jaka jngohkai pyrthei hapoh ka district, ban long kiba husiar bha khamtam ha kane ka aiom slap. Kane ka jingbthah la pynmih mamar ka jingjur jong u slap kaba lah ban wanrah ïa ka jingtwa ki lynti syngkien, kaba lah ban don ka jingshlei um bad kiwei kiwei ki ba lah ban shahktah na ka ne ka aiom slap.
Ka Deputy Commissioner ka la bthah ïa ki nongjngohkai ba ki dei ban phong ïa ki jaket ba ai jingïada (Life Jacket) bad phikir bha haba leit sha ki bynta ba don um, lane shong lieng ne kino kino ki jingïalehkai ha ka um. Dei ban bud ïa ki dak jingïada bad ki jingbthah ba la buh da ki bor pynïaid bad m dei ban leit rung sha ki jaka ba la mana ne kiba don jingma.
Ym dei ban leit marwei sha ki wah, pung ne ki jaka ba jur ka jingïaid ka um. Dei ban peit bha ïa ka jinglong ka suiñbneng shuwa ban leit jngohkai, sumar bha ïa ki khynnah bad wat iehnoh marwei ïa ki. La kyntu ruh ïa ki nongjngohkai ba ki dei ban sumar ïa ka mariang ban leh khuid bad ban kiar na kaba bret pathar ïa ki ñiut ne ki plastic.
Haba jur slap, jur lyer ne don jingma na ka jingtwa khyndew, dei ban mih noh mar mar na ka jaka kaba ki don. Dei ban kohnguh bad bud ïa ki jingbthah jong ki bor shnong, ki nongïalam shnong bad ki bor sorkar.
Dei ban burom ïa ka kolshor bad ki riti dustur jong ka shnong ka thaw bad ka thaiñ. Haba don kano kano ka jingjia kyrkieh ne jingdonkam jingïarap, dei ban phone ha 112. La kyrpad ïa ki paidbah ba ki dei ban khmih ïa ki jingmaham ba la pynmih na ki bor Distrik bad na ka IMD.
Na ka liang ka DDMA ka la pynmih ruh ïa ki jingbthah ïa ki nongleit nongwan sha ki jaka jngohkai ïa kiba kim dei ban leh kum kaba jngi ha ki jaka ba la khang ne kiba don jingma ha ka por ba jur slap, heh um ne ha ka por ba jur lyer. Kim dei ban weng ne law ïa ka jaket ai jingïada haba ki shong lieng lane haba jngi. Kim dei ban pynjulor ïa ki mawbynna, mawkyrteng, ki tiar lane ki kynja jingthung, kim dei ban kdiah, pruid, thoh, ne pynsniew ïa ki mar ki mata paidbah.
Ym shah ban rung sha ki jaka ba la khang ne ba don jingma.Ym shah ban pynsawa than ïa ki jingtem jingput ne pynwit ïa kiwei pat.La khang ba ym dei ban ai bam ïa ki mrad khlaw ne pynthut ïa ki jaka shong jaka sah jong ki.
Ym shah ban dih kyiad ne ki jingdih ba sniew ha ki jaka ba la maham bad khang pyrshah.Ym dei ban ïaid lane leit marwei ha ka por miet ne ha ki jaka ba long kynjah.La kyntu ïa ki nongjngohkai ba kim dei ban leit kiew sha ki maw lane ki riat kiba syntuid ban lait na ki jingmynsaw.
Lada don kino kino ki jingjia kiba ki donkam kyrkieh ïa ka jingïarap ki lah ban pyntip mar mar ha kine ki number District Disaster Management Authority (DDMA) 08974579811/9485005523, District Control room Telephone number 03657-282254/1077, Emergency Helpline Number 112, Police Control Room 7629981814 bad sha ki BDO jong ki Block.
