Ha ka jingïalang ka JCMDA ha Khliehriat, pynpaw ki paidbah ïa ka jingthrang ban plie noh ïa u dewïong

Khliehriat Naitung 12: Ha ka jingialang ba la khot pynlong da ka Jaiñtia Coal Miner and Dealer Association mynta ka sngi ha iing Community hall ha Khliehriat West, ki paidbah kiba na ri lum Jaiñtia khamtam na East Jaiñtia Hills ki la ioh ka lad ban kren ha ka jingialang bad ki la pynpaw ruh ïa ka jingthrang bad jingangnud jong ki ban plie noh ïa ka kam dewïong namar kiba bun ki paidbah jong ka district ki dei kiba ju im ja kpoh da kaba trei dewïong bad kane ka jingkhang ban tih bad khaii dewiong ka la ktah shikatdei eh ia ka ioh ka kot jong ki paidbah bad buh jingeh ha kiba bun ki liang.
Ha ka jingialang jong ka JCMDA, ka MLA Sutnga-Saipung ka kong Santa Mary Shylla ka la pynsngew sha ki paidbah ïa kaei kaba mih na ka jing iakren u myntri rangbah ka jylla, u Conrad Sangma ha leit iakynduh ïa u myntri ka sorkar pdeng ha Delhi uba dei peit ïa ka kam tih marpohkyndew ha kaba ka kong Santa ruh ka la leit lang sha nongbah Delhi, ka MLA ka la ong ba “Ha kato ka sngi ka jingiakren ka long kaba sei soh ha kaba la khmihlynti ba yn sa ioh ban tih dewïong da ka Siencetific Mining Plan bad u myntri ka sorkar pdeng u la bthah ba dei ban thaw ïa kawei ka committee hapoh ka jylla bad ki heh jong ka sorkar jna ka tnat ong ka Coal Mine kin sa iakynduh bad ki heh sorkar ka jylla kiba na ka tnat Mining and Geology bad ynda la dep thaw ïa ka committee ka kam kan sa iaid shuh shuh shakhmat ban peit ïa ki jingdonkam ne ki procedure ioh lehse ki lah ban wan leh ruh ia ka jurip, u myntri jong ka Coal u la ong ruh ban phah ïa ka kaiphot na ka sorkar jylla ban ioh bishar bniah, na ka liang u Conrad Sangma u la pynsngew ba ha ka MMDR Act ka don ka section-6 ban kyrpad ban aiti noh sha ka sorkar jylla na ka bynta ki jaka ban tih dewïong”
La pynsngew shuh shuh ba wat na ka liang ka sorkar pdeng ruh ka kwah bha ban pynurlong ïa kane ka kam dewïong ha kylleng ka ri India, namar mynta ka India ka kynduhjingeh ha ka umphniang petrol lane ka Fuel Crisis kumta u Minister of Coal u ai ka jingkyrmen ba bha ban ioh ka lad ban ttih dewïong,
Ka MLA ka la ong ruh ba ka sorkar MDA naduh u snem 2019-2020 ka la iaid lynti bad lap ba ka jingdon u dewïong hapoh ka jylla ka long ba u dewïong u don ka jingrben kaba tang ar haduh lai phut na kata ka daw ka eh than ban leh da ka open cast ha kaba kumno yn shu khlong lut ïa baroh ka khyndew ban ioh ïa u dewïong uba tang ar haduh lai phut bad kane kan sa ktah ïa ka mariang bad ia ka khyndew ruh shano yn leh bret, ha kajuh ka por ka MLA ka ai khublei ia ka Association kaba trei shitom bad iakhun ban ioh ia kane ka Scientific Underground Mining, ka kular ruh ba na ka liang jong ka bad u MLA jong ka Khliehriat kin nang iai treishitom shuh shuh ha kaba iadei bad kane ka kam dewiong.
Na ka liang u bah Kyrmen Shylla, uba dei u MLA jong ka Khliehriat, u la ong bad pynpaw ” Baroh ngi tip ba u dewïong u dei ka ja kpoh jong ngi hangne,kane ka jing wan poi lang jong baroh sha kane ka jingialang ka long ban ngin iakhun lang, ym tang ban im tang shimet hynrei ban im ka pateng ban wan, ban im ka ri Jaiñtia bad ka jylla hi baroh kawei, naduh ba khang dewïong naduh u snem 2014 ngi la mad bun ki jingeh, tangba haba peit ha kine ki lai tylli ki bnai ba ka JCMDA lem bad ki paidbah naduh ka 7 tarik la pynlong ïa ka rally paidbah, ngi ki MLA ar ngut ngi la iaid lynti ngi la iakynduh ïa u myntri rangbah ka jylla, kumjuh ruh ia u Symbud Myntri rangbah bunsien, ngi la ia shong pyrkhat lang bad ki heh sorkar bad shna ia ka Mining Plan kaba long katkum ka jingdawa ka kam, nga ai ka jingiaroh ïa ka JCMDA bad baroh kiba donkti lang bad khmihlynti ba kane ka jingiaid lynti kan poi sha ka thong” ong u bah Kyrmen Shylla.
U Vice President ka JCMDA, u bah Justine Dkhar ha kaba u la pynsngew ïa ka jingiaid lynti ka seng dewiong bad ong ba kane ka jingiaid lynti bad jingiakhun ka long ban dup ioh da ka Permanent Solution ka ban nym buh jingeh ia ki paidbah ba trei dewiong, kumjuh ruh u Adviser ka JCMDA, Dr P.Nongtdu ha kaba u la pynsngew ia Presentation ba ka seng ka la dep aiti sha ka sorkar, kaba kynthup naduh ki aiñ, ki kyndon ban iada ïa ki nongtrei par, ban iada ia ka mariang, ban iada ia ki jaka rep bad kiwei kiwei.
Kiba la ai jingkren ki kynthup ruh u Secretary JCMDA, bah Samanbha Supooh, uba la pynsngew ruh ïa ki kam bad jingiaid lynti ka JCMDA ha ka jingiakhun ban ioh biang ban trei dewiong, ka MDC Rymbai, ka kong Violet Lyngdoh, President Jaintia National Council, bah Sambormi Lyngdoh, President Meghalaya People United Front, bah Kyrshan Blah bad kiwei kiwei bad ia ka jingialang la pyniaid da u President JCMDA, bah Borin Shadap.