Shillong, Naitung 12: Ka Seng Kur Lyndem bad Ryndem ka la rakhe ïa ka jingdap 25 snem jong ka seng ha Bharat Scouts and Guides Hall, Shillong. Ha kane ka jingrakhe la pynlong ruh ïa ka jingïathir jingmut halor ki mat bapher bapher kiba ïadei bad ka kolshor bad ka pateng tynrai.
Kawei na ki nongai jingkren, ka Samla Yemame Lyndem, PhD, Department of Food & Folklore, NEHU, ka la kren halor ka phang “Ka jingsngew ba maïan u Khasi halor ka bam ka dih.”
Ha ka jingkren jong ka, ka la batai ba ha ka kolshor Khasi, ka bam kam dei tang ka jingïoh bam hynrei ka don ruh ka jingïadei kaba jylliew bad ka jingngeit, ki rukom lehniam, ka jingburom ïa ki tymmen bad ka jingïatylli jong ka ïing ka sem bad ka imlang sahlang.
Ka la ong ba ki jait bam tynrai, ki rukom sam bam ha ki lehniam bad ki jingrakhe bapher bapher ki pyni ïa ka jinglong kyrpang jong ka kolshor Khasi. Ka la kyntu ïa ki samla ba kin nang wad jingtip, sumar bad pynneh pynsah ïa kine ki jingriewspah kolshor khnang ba kin ym jah noh hynrei kin bteng ban long ka bynta jong ka jinglong tynrai u Khasi na ka bynta ki pateng ban wan.
Ha kawei pat ka liang ka Kur Lyndem bad Ryndem ka la ai burom ïa ki para kur ba ki la ïoh bynta ïa jingïalang jubilee rupa ha kaba u Rangbah ka kur u Rangbah Damon Lyndem ki la pynsngew ïa ka pasoh jong ka Kur “Ban tip ïa la ka kur, ban pynneh ïa ka riti bad ka dustur kong jong ka Kur.
Shuh Shuh ka Kur Lyndem ka la khot sngewbha ruh ïa u Pastor Rev. O. L. Snaitang ban pashat ïa ka jingkordor jong ka kur ka Bri u Hynñiewtrep kumno ban ‘Tehsong la Kur, hapoh ki rympei ïing.
U Pastor Snaitang u la pashat kumno ka dei ban ïaid bad kyntiew ïa ki khun samla jong ka kur ban ïabeh ïa ka thong jingtip jong ka kur bad tip ïa ka longkur longkha haba ïa poikha.
U Pastor u ban ruh ïa ka kur Lyndem ba ka dei ban pynim ka kur ka mei tymmen ma tymmen ban nym shong sang hynrei ïa ka jait kiba pynroi ym ban ai jait ne shim jait na u kpa.
