Shillong, Ïaiong 22 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba don da u pud ïa kaei kaba u Administrator u lah ban leh bad ba ka jingpynjlan ïa ka samoi jong ka Garo Hills Autonomous District Council (GHADC) ka dei na ka bynta ban pynkylla thymmai ïa ka AD Rules hadien ba ka la don ka jingïakhih pyrshah kaba jur ïa ka jingïoh shim bynta ki bym dei ki trai muluk ha ka elekshon District Council.
Haba jubab halor ka jingdawa ban wanrah da ka jingsynshar administrator ha GHADC, u Bah Prestone u la ong, “Shah ïanga ban pynshai bha. Lada phi ong ba phim donkam ban pynjlan ïa ka bor synshar jong ka District Council ha ka dur jong ki nongmihkhmat paidbah, shah ïanga ba ngan pyntip ba lada ka sorkar ka shimti ngi khot ïa ka ka synshar administrator. Lada jia ba thung da u administrator ka bor trei jong u ka don da u pud ban mynjur ïa ka Bill namar kane ka ïasoh bad ka jingpynkylla ïa ka Rules bad jingpynkylla ïa ka Act,” u la ong.
Kumta u la ong ruh ba im lah satia ban shu kren kumto namar kane ka dei beit ka ishu jong ki ain ki kyndon bad ka jingpynbeit ïa ki rule bad ki kyndon. “Ym don mano mano ruh ba lah ban leh ïa kata lait noh tang ka Iing Dorbar hapoh ka District Council,” u la ong. Haba pynpaw halor kine ki jingeh, u Bah Prestone u la ong ba ka sorkar kam banse ban pynjlan ïa ka samoi treikam jong ka Council.
“Kumta, da kaba peit ïa kine ki jingeh kiba ngi don,ka pynlong ïa ka sorkar ban hap pynjlan ïa ka samoi treikam haduh hynriew bnai khnang ba hapoh kane ka por kin ïoh ban pyndep hapoh ka Iing Dorbar, ban shim ïa ka rai bad ban wanrah ïa ka jingpynkylla,” u la ong.
Kane ka jingpynjlan ïa ka elekshon ka wan hadien ba la mih ki jingïakhih kiba jur ban pyrshah ïa ka jingïashim bynta jong ki bym dei ki riewlum ha ka elekshon jong ka council, kaba la poi haduh u pud ba hap ban pynkynrïah noh ïa ka elekshon GHADC, na kaba la buh ban long ha ka 10 tarik u Ïaiong. Haba kren pat halor ka thup kyrteng thep vote ba kyrpang jong ka GHADC, u la ïathuh ba ka Delimitation committee ka dang don mynta ha ka kam.
