Byrngem ka VPP ban pyndap smam ha kylleng ki surok ka sor Shillong bad ban tur sha Secretariat

Shillong, Ïaiong 22: U President ka Voive of the People Party (VPP) u Bah Ardent Miller Basaiawmoit u la buh ka jingkyntu ïa ki paidbah nongkyrshan jong ka party ba kin ïa mih paidbah ban pyndap ha kylleng ki surok ka sor Shillong bad tur lang sha Secretariat ban dawa pynurlong ïa ki phra tylli ki mat jingdawa jong ka party, ïa kane ngin y map haduh u 2028.
Ïa kane u Bah Ardent u la pynpaw ha ka jingialang paidbah jong ka VPP kaba la pynlong ha Motphran, mynta ka sngi ka 23 tarik u Ïaiong bad la sakhi ïa kiba bun ki paidbah kiba la wan ban sakhi.
Kine ki phra tylli ki mat jingdawa kiba ka party VPP kala pynsngew sha ki paidbah kiba la poi sha ka jingialang ki kynthup ban pynduh noh ïa ka kam jngohkai ne ka tourism hapoh ka dewlynnong u Lumpongdeng ha kaba u Bah Ardent u la ong ba ka VPP kan ym shah ba ka sorkar kan ai wai haduh 60-90 snem hynrei kadei ban pynduna bad u la pynpaw ruh ba kim pyrshah ïa ki kam pynroi hynrei ki pyrshah ba ioh jingmyntoi ki nongwei bad ki heh spah.
Ka mat kaba ar kadei ba ka sorkar kam dei shuh ban dang pynjynjar ïa ki nonghikai ha kaba u la ong ba ma ka por sha ka por la iohi ba ka sorkar ka phah ban leh ïa ki eksam bapher bapher bad u la bynrap ruh ba ka sorkar ban dei shuh ban phah pyndonkam ban leh ïa ka khana samari bad ka jingphah sha ka duty election nalor kiwei pat.
Ka mat jingdawa kaba lai ba u Bah Ardent u la pyntip ha kaba iadei bad weng noh ïa ki briew kiba dei ki dkhot jong ka DSC bad ka MPSC kiba don ka jingiadei bad ka NPP, UDP, HSPDP namar ba ka jingdon ka jingdon ki briew ba don ka jingiadei bad ki seng sain pyrthei ka khang lad noh ïa ki samla kiba dei hok ban ioh.
Ka mat jingdawa kaba saw kadei halor ban sangeh noh ka jingpynjlam kam ïa ki briew kiba la shongthait, namar ba kane ka kan ktah ïa ki khun samla kiba la nang la stad kiba ym donkam ym donjam.
Ka mat kaba san kadei halor ka jaka paidbah ne ki ri raid bad u Bah Ardent u la ong ba ka VPP kan ym ai lad ïa ki Syiem ki sordar kiba die duh ïa ki khyndew ki shyiap jong ki Raid.
Ka mat kaba hynriew kadei ban ïada ïa ki briew kiba sah ha ki thain khappud ha kaba u Bah Arden u la ong ba ha kine ki khyndiat sngi la wan ki briew na Mawsikar bad Lapangap, ka sorkar kam shah ïa ngi ban shna ïing kam shah ia ngi ban rep hynrei u Nepali u wan rep ha ka jaka jong ngi.
U Bah Ardent u la pyntip ruh ia ka mat jingdawa kaba hynniew kadei ban wad ïa ki briew kiba na kiwei pat ki jaka, ki bym dei ki nong India ne ki trai ri trai muluk ne ka mat jingiakhih mynder kaba la jia ha ki snem 1972 eiei hynrei haduh mynta ym don jingsei soh.
Ka mat kaba phra kaba u Bah Ardent u la pyntip kadei halor ka jingshah khang tih dewiong u la ong ba wat lada la shah khang hynrei ki briew kiba don ka jingiadei bad ka sorkar, kumta ngi ruh ngin phah tih lang beit ia u dewiong, namar ba u dewiong u dei ka spah jong ri kumta dei hok ban bynta lang.