Buddien ka sorkar ban ïoh pynrung kyrteng tang ki riewlum trai ri ha ka Thup Kyrteng elekshon ka GHADC

Shillong, Iaiong 22 : Ka Sorkar Jylla ka la shim ïa ki bynta ban wanrah ïa ka rukom thep vote kaba kyrpang ha kaba tang ki Riewlum trai ri trai muluk kin ïoh na ka bynta ka election MDC sha ka ïing dorbar thawaiñ Garo Hills Autonomous District Council (GHADC). Ka la bud dien ruh ban ioh pynrung kyrteng tang ki Riewlum trai ri trai muluk ha ka Electoral Roll ban pynskhem ïa ka synshar ki Riewlum trai ri ha ki jaka Sixth Schedule.
Kane ka jingshim khia ka dei kaba thmu ban pynskhem ïa ka jingkut jingmut ha ka ban ïada ïa ka hok, ka jingithuh kyrpang bad ka jingsynshar laitluid jong ki jaidbynriew trai ri ka Jylla.
“Da ki phew snem, ka jingdawa ban ïada ïa ka election MDC sha ka GHADC ka la suhthied ha ka jingangnud jong ki jaidbynriew trai muluk” ong ka kyrwoh bala pynmih ha ka sngi Ba-ar.
Ka la pynpaw ba ka jingtyrwa ïa ka Electoral Roll tang jong ki ST ka thmu ban ïada ïa ka jingdon paid bad ka lawei jong ki riewlum bad ïada ïa ki jaka ki riewlum, da kaba pynkhlaiñ bad pyrkhing ïa ki kyndon die jaka, ban pynthikna tang ki nongmihkhmat riewlum kin synshar bad ïa shim bynta ha ki kam jong ka synshar khadar ha ki jaka ba hap hapoh ka Sixth Schedule.
“Da kaba pynthikna ba tang ki nongthep vote Scheduled Tribe kin ia shim bynta ha ka election GHADC, ka Sorkar ka pynskhem ïa ka Nongrim jong ka Riti Synshar ba ka synshar khadar ha ki jaka riewlum ka dei ban don ïa ka jingkitkhlieh tang ïa ki jaidbynriew trai ri, ka ban ai jingïada ïa ka hok tynrai, ka khyndew ka shyiap bad ki bor synshar na la tynrai” ong ka kyrwoh.
Ka bynrap ba kane ka sienjam kan wanrah biang ïa ka “jingmut jong ka Sixth Schedule jong ka Riti Synshar ka Ri India, ka ban pynthikna ba ka Synshar khadar ïa ki jaka ki riewlum ka dei ban neh beit ha ka kti jong ki nongmihkhmat trai ri trai muluk”.
U Myntri Rangbah ka Jylla Conrad K Sangma ula ong ba ka jingthmu ba kongsan eh jong ka Sorkar ka long ban pynthikna ba ka synshar khadar, ka jingthaw policy bad ka jingpynïaid ïa ki kam kan dei kaba la buh beit da ki paidbah kaba ka dei ban shakri.
U Conrad ula ïasaid man ka por halor ka jingïada ïa ka hok ki trai ri trai muluk lyngba ka jingïakren kaba tei bad ki bor ka aiñ.
Ula pynskhem biang ïa ki paidbah ban burom ïa ka rukom ïaid ka synshar paidbah bad ban buh hakhmat eh ïa ka Jaidbynriew bad ka bha ka miat ka Jylla, haba ïatreilang ban wanrah pat ïa ka jingshongsuk shongsaiñ.