Shillong, Nailar, 27: Ka Khasi Students Union (KSU) Wapung Unit hadien ba ladep phah ïa ka ujor sha ka Jaiñtia Hills Autonomous District Council (JHADC), ha ka sngi Balang ka la ujor sa ha Meghalaya state Pollution Control Board (MSPCB) ban khang kyrdep noh ïa ka Abhi Coke Pvt ltd.
Ka Seng hapoh ka jingïalam jong u President u Samla Deiniwan Lyngdoh bad u General Secretary u samla Shwari Ryngkhlem GS ryngkat ka jingsynran lang jong Asst. Secretary ka KSU East Jaiñtia Hills District Unit u u Samla Pynshai Kupar Dkhar ki la aiti ïa ka jingujor ha u Chairman ka MSPCB.
Ha u kyrwoh ba la phah da u Publicity Secretary ka KSU Wapung Unit u samla Shibaitlang, ka seng ka la kam ba ka lap ba ka jingdon ka Abhi Coke Private Limited kam don jingmyntoi eiei ïa u paidbah hynrei ka wanrah pynban ka jingma suda ïa u paidbah.
Ka Seng ka lap ruh ba kane ka karkhana ka la pynkheiñ ïa ki aiñ ki kyndon jong ka EIA 2006 ha ka jingpynmih ïa u Coke.
Ka Seng ka la ong, ba katkum ka EIA 2006 kane ka karkhana Coke ka dei ban pynmih ïa u Coke tang 25000 hajar metric ton ha ka ha ka shisnem hynrei ka la pynmih ym duna ïa ka 36000 metric ton ha ka shisnem. Ka Seng kam shongthait ban ïaid shaphrang ban dawa ban khang khyrdep ïa kaane ka Abhi Coke Pvt ltd, ong u kyrwoh.
Ha kajuh ka por, ka Seng ka la dawa ïa u Chairman ka MSPCB ba dei ban tohkit bbha lyngba ka ophis jongki ïa kane ka karkhana Coke bad kumjuh ruh katkum ki kyndon jong ka EIA.
“Ka seng kam shongthait ban ïaid shaphrang katba kane ka karkhana Coke kam pat khang khyrdep lada shim por da ki snem ruh ka seng kan ieng skhem ha ka nongrim ba u paidbah un ïoh ban im suk ban ïoh ban ring mynsiem da ka lyer kaba khuid,” ong u kyrwoh.
“Ka Seng ka dap ruh da ka jingsngewphylla ba ki briew jong kane ka karkhana coke ki la tyrwa ïa ngi da ka bai bnai lada ngi ïaid shaphrang. Ka kyrwoh ba shai sha ki briew kane ka karkhana coke phim lah ban thied ïa ngi da leilei ruh ngin ieng skhem ha ka nongrim baskhem bad ngim shongthait ban ïaid shaphrang ban dawa lada shim por da ki snem ruh.
“Ka Seng ka kyrmen skhem ba ha kawei ka por ngin sa ïoh ïa ka jingjop ba u paidbah un ïoh ban im suk ban ïoh ruh ban ring ïa ki lyer ba khuid, pynkut u kyrwoh.
