Shillong, Naitung 22: Ka United Liberation Front of Asom (Independent) ka la pynbna ba ka kyntait ban pdiang ïa ka jingkhot jong ka ïingkashari Special Court ka National Investigation Agency (NIA) ïa ki nongïalam.Kiba shah khot hajir ki kynthup ïa u Chairman bad General Secretary, halor ka case ba ka wang bomb grenade ïa ka len shipai ha u snem ba la lah.
U Ishan Asom, Nongïalam ka ULFA (I) ka Publicity Wing ula ong, “Ka jingïakynad hapdeng ka Assam bad India kam dei satia tang ha ka shongsuk shongsaiñ, hynrei ka dawa ban pynbeit da ka bor synshar khadar. “Ula kyntu ïa ka NIA ba kan tynruh ïa ka Sorkar Pdeng ba kan ïakren halor ka jinglaitluid ka Assam.
Dangshen, ka NIA ka la phah notice ba khot hajir ïa u Chairman ka ULFA(I) Paresh Baruah, u Nongïalam ka kynhun Arunodoy Ason bad kiwei, ban bishar halor ka jingkawang hang grenade ïa ka len shipai ha Kakipathar, Upper Assam, Tinsukia District ha u bnai Naiwieng 2023.
Watla ym shym la don mano mano ka mynsaw, ïa kane ka case la aiti ban tohkit ha ka NIA.
Ha u Jymmang, ka NIA ka la aiti ïa ka chargesheet pyrshah ïa u Baruah bad 5 ngut kiwei pat, ba kynnoh ba ki dei kiba kynshoit bad suhbuit ïa kane ka jinghiar thma ba la leh da ki arngut ki samla kiba shong thuk thuk.
Ka ULFA (I) ka la kyntait ïa ka jingdonkam bad kynnoh kylla ïa ki kynhun syntiat kum ka RAW, IB bad MI kiba leh ïa kane ka kam.
