Shillong, Naitung 22: Ka prokram kaba shi sngi ha kaba ïadei bad ki kam aiñ ne ka Legal Awareness programme cum Campaign kaba dei ka lad ban plie ïa ki khynnah pule bad kiba la pep skul shiteng por la pynlong ha ka shnong Chidekgre kaba hab ha West Garo Hills district.
Ïa kane ka prokram la pynlong da ka District Legal Services Authority, West Garo Hills, Tura hapoh ka jingïatreilang bad ka Meghalaya State Legal Services Authority kaba dei hapoh ka shatri jong ka National Legal Services Authority.
Lah ban pynkynmaw ba kane ka jingthmu jong kane ka prokram kadei halor ka jingdonkam jong ka pule puthi ki khynnah bad khamtam eh ïa kito kiba pep skul shiteng por.
Ha kane ka prokram na ka liang ka Legal Aid Counsel, DLSA, Tura Grangchira Ch Marak ka la kren halor ka hok jong ki khynnah pule kaba ïadei bad ka aiñ “Right of Children to Free and Compulsory Education Act, 2009”, ha kaba la bynrap ba kane ka aiñ kaba la pyntreikam da ka Parliament ka ri ha ka snem 2009 ka long kaba donkam bha. Ka la ong ba kane ka dei ka aiñ kaba ai jingïarap ïa ki samla pule ba kin ïoh pule da ka jinglaitluid hapdeng ka rta kaba 6 haduh 14 snem ha India bad kane ka dei ruh hapoh ka Article 21A jong ka Indian Constitution. Halor kane ka aiñ, ka sorkar ka dei ban pynïoh ïa ka pule puthi kaba kongsan ne elementary education sha ki khynnah bad ki open school sha ki shnong kiba marjan khang ba ki khynnah pule kim donkam ban leit shajngai bad kumjuh ruh dei ban pynbiang ïa ka bam ja sngi bad kam dei ban don ka jingshah pynshitom ïa ki khynnah pule. Haba batai halor ka jingdonkam jong ka legal service sha ki paidbah, Jeriko R Marak, Advocate Bar Association, Tura la ïathuh shaphang ka Immoral Trafficking (Prevention Act, 1956/ Child Sexual Exploitation/ Trafficking) bad banjur halor ki kyndon jong ka aiñ bad kiwei ki jingshah pynshitom.
