Kynnoh kiba shah kem ha Rimpu Bagan ba byrngem ka Pulit ban ym ai vote ïa u Bernard
Shillong, K’lyngkot, 25: Shiphew ngut ki briew kiba la shah kem ha ka jingkhynra jong ki Pulit ha Rimpu Bagan ha u Naitung, 2022, ha ka sngi Balang ki la kynnoh ba ka Investigating Officer (IO) ka la byrngem ïa ki ban ym ai vote satia ïa u nongïalam ka BJP u Bernard N. Marak uba long ruh u MDC jong ka Tura.
Kine ki shiphew ngut ki la buh jingkylli ruh ïa ka rai jong ka Meghalaya Human Rights Commission (MHRC) kaba la pynjlan ïa ka jingshong bishar kaba dei ban long ha ka 18 tarik shaduh u bnai Lber.
Ki don baroh 35 kiba la shah kem ha Rimpu Bagan ha ka jingkhynra jong ki Pulit ha u Naitung, 2022 bad hadien ba la lait jamin ki la ujor hakhmat ka MHRC.
Lah ban kdew hangne ba ki Pulit ki la kem ruh ïa u Bernard N. Marak halor ka jingkynnoh ba u la pynïaid ïa ka ktem awria ha Rimpu Bagan.
Haba kren sha ki lad pathai khubor, ki shiphew ngut ki briew ki la ong ba mynta ki la kylla long ki lanot saiñpyrthei bad ki dang ïakhun ban ïoh ïa la ka jong ka hok.
Ki la ong ruh ba ki ladep ujor hakhmat ka MHRC ha u Nailar, 2022 hynrei haduh mynta ka Commission kam pat shong bishar satia wat tang shisien ruh.
“Ka jingshong bishar kaba ladep ban pynlong ha ka 18 tarik bad 19 tarik Kyllalyngkot, hynrei u Superintendent of Police bad kiwei kiwei ki Pulit ki la wan ha ka 17 tarik Kyllalyngkot ban pyntip ïa ngi ba ïa ka jingshong bishar la pynkynriah haduh u bnai Lber ynda ladep ka elekshon. Ngim lah satia ban sngewthuh ka don jingïadei aiu kata ka elekshon bad ka Human Rights Commission? Lada jia eiei ai ngi, mano ban shim ïa ka jingkitkhlieh? Ngi syier mynsiem namarba ngi la shah byrngem hadien ba la buh ïa kane ka ujor,” la ong kawei na ki samla kynthei.
Haba kylli, ka la ong, ba kin sa phah ruh da ka jingthoh sha ka MHRC halor kane kam ban dawa ba dei ban thung bujli noh da uwei u SP ha ka jaka jong u Vivekand Sing Rathore.
Ka la ong, lai ngut ki 35 ngut ki briew ki ladep ujor sha ka NHRC ha kaba la bthah ïa ki ban kin ai sakhi ha u SP. “Lada u SP uba la kem ïa ngi kumno un shim sakhi na ngi? Dei ban buh da kiwei ki Ophisar Pulit,” ka la ong.
Kane ka lanot ka la ong ba ka Investigating Officer ruh ka la maham ïa kiba la shah kem ba kim dei satia ban ai vote ïa u Bernard N Marak.
“Ki dei ban pyndep ïa ka kamram ban khynra bad ban tohkit, hynrei, khamtam ka IO ka la maham pynban ïa ngi ba ngim dei ban ai vote ïa u Bernard N. Marak,” ka la ong.