Ka jingkular jong ka TMC ban pynurlong ïa ka FARM ka dei kaba shu thok: NPP

0

Shillong, K’lyngkot, 25: Ka National People’s Party (NPP) ha ka sngi Baar ka la kynthoh ba ka jingkular jong ka All India Trinamool Congress (AITC) ha ka Election Manifesto ban kyrshan jingïarap pisa T.10, 000 hajar ïa ki nongrep lyngba ka Farmers’ Assistance for Rural Meghalaya (FARM) Scheme shisien shi snem ka long kaba shu thok.
Ha u kyrwoh, ka NPP ka la ong, “ki nongïalam jong ka AITC ha ki samoi ba ki la synshar ïa ka jylla ha ki snem 2010 – 2018 kim shym la sngewthuh satia ïa ka jingeh jong ki nongrep bad ki la iehbeiñ ïa ki. Mynta, ka Sorkar ba ïalam da ka NPP naduh 2018-2023 ka la wanrah ïa ka skhim sha ki nongrep kaba la tip kum ka Focus bd Focus +, ka AITC ka sheptieng bad ka wad ïa ki lad ki lynti kumno da kaba kular ban ai jingkyrshan pisa ïa ki nongrep, ïa kaba ka Sorkar jong ka NPP ka ladep leh ïa kane bad kan dang ïai bteng ruh ban pyntreikam ïa kane ka skhim ha ki 10 snem ban sa wan.”
Da kaba ïaiban ba ka jingkular jong ka AITC ban ai jingkyrshan pisa kam long eiei ruh em hynrei ka dei tang ka ‘baaki card’ (credit card), ka NPP ka la ong, ba bun na ki paidbah ka jylla Meghalaya ki ladep kyntait ïa ki jingpynrung kyrteng thok bad shim ruh ba kine ki prokram ki dei tang ki jingkular thok suda. Ka AITC ka la pyrshang ban pynphriang ïa ka jingïalap elekshon lyngba ki lad pathai khubor bad ba ki don bun kiba la pynrung kyrteng, hynrei ka dei tang ka jingpyrshang put turoi jong ka party.
Ka la ong ruh ba ka NPP hapoh ka jingïalam jong u National President u Conrad K Sangma u la wanrah ïa ki prokram ba pynmyntoi ïa ki paidbah kum ka Focus bad Focus +, kaba la pynmyntoi haduh 3.1 lak ngut ki nongrep.
“Ngi sngew ba ka AITC bad ki nongïalam jong ka, ki shu ïohthiah ha ka por ba ki dang bat ïa u lakam synshar bad mynta ki pyrshang ban shim kabu da kaba ka NPP ka ladep sdang. Ka AITC ka dei ban peit tang ïa ki ishu kiba ïadei bad ki paidbah ban ïa kaba ki pyrkhat shaba palat kumba ki ladep leh ha Bengal bad thmu ruh ban leh kumjuh ha Meghalaya,” ong ka NPP ha u kyrwoh.
Shuh shuh ka NPP ka la ong ruh ba ka jingkular jong ka AITC ban buh ïa ki FARM Centre ha manla ki District, ki dei kiba ladep sdang lypa ha ka jylla ïa kiba la leh da ka Sorkar MDA hapoh ka jingïalam jong ka NPP.
Ha ki san snem ba la leit noh, haduh 330 tylli ki Integrated Village Cooperative Societies ladep pynkha, 300 tylli ki Collective Marketing Centres bad 50 tylli ki Farmer’s Market ladep tei ha baroh kawei ka jylla ban pynsuk ïa ki nongrep. Haduh mynta, palat 1,00,000 lak ki longiing ki la ïoh jingmyntoi lyngba kine ki kam ba la wanrah da ka Sorkar MDA hapoh ka jingïalam jong ka NPP.
“Kaba lyngngoh ka long, ka jingkular ban wanrah ïa ka FARM da ka TMC ka dei ka bym shai bad kaba shu shim bujli. Kim don kano kano ka jingbuh jingkheiñ ïa ka jingdon jong ki nongrep ki ban ïoh jingmyntoi bad kiwei pat ki jait kam ba kin sdang thymmai. Kine ki jingkular ki dei kiba thylli bad ki dei tang ban shu put turoi,” ong ka NPP.
Ka NPP ka la kdew ruh ba ha ki snem 2010-18, ki nongrep ha ka jylla ki la ïakynduh mawsiang, na ka daw ka jingbym ïoh jingkyrshan bad ka jingïarap pisa na ka Sorkar. Ki nongrep ki la shah pynduh ban ïoh jingïarap shiteng dor (subsidy) bad ka dawai sboh ha ka kyrteng ban pynlong ïa ka jylla kaba kyntiew kaba kyntiew ïa ka rep tynrai, kaba la ktah pat ïa ki nongrep.
“Da kaba shimkhia ïa kane ka jingeh jong ki nongrep, ka Sorkar MDA ba la ïalam da ka NPP ka la pynsdang ïa kiba bun ki prokram kum ka FOCUS, FOCUS+ bad ka Marketing Infrastructure & Supply Chain. Ka jingthied ïa ki mar rep ba kham heh dor kum u shynrai, u sying bad kiwei kiwei da kaba sdang ruh ïa ki lad ban pynïaid iew,” la ong u kyrwoh ka NPP.
Ka la bynrap ba ka Organic Agriculture Policy ka dei kaba la kdup palat 15,000 hectare ki jaka rep ha ki bynta bapher bapher jong ka Organic Certification da kaba ïasnohkti lang bad ki 15,000 hajar ngut ki nongrep bad kumba 28 ki FPC. Bun tylli ki Mission Mode project kiba la dep pynsdang, bad kiba la pynhap hapoh ka rep ka riang bad kiwei pat ki jingïarap ha kaba rep ïa u shynrai Lakadong, u sying, ka ngap, ki musli musla, ka Mushroom Mission, ka dud, u Soh Phan bad kiwei kiwei ki mar rep.
Ka State Piggery Mission, kaba heh tam ha ka ri, ka la sdang da ka jingmang pisa kaba T. 209 klur khnang ban dup lah ban pynmih hi na lade ïa ka doh sniang. Ka Meghalaya Milk Mission ka dei kaba la pyntreikam da ka jingkyrshan pisa kaba T. 215 klur.
Haba pynpaw ba kine ki thong ki la pynkmen ïa ki nongrep, ka NPP ka la ong, ki jingkular ba shu thok jong ka TMC ki dei ban kham shai bad jin lada ki kynrad saiñpyrthei ha Kolkata kin kham peit ïa ka jingeh jong ki nongrep ha Bengal shwa ban durut ha Meghalaya.

Leave A Reply

Your email address will not be published.