55 ngut ki kyrtong sei madan ka AICC ban pynïakhun ha ka Elekshon 2023
Pynbna ka AITC sa 3 ngut ki kyrtong
Shillong, K’lyngkot, 25: Ka All India Congress Committee (AICC) ha ka sngi Balang ka la pyllait ïa ka thup kyrteng ba nyngkong jong ki 55 ngut ki kyrtong ki ban aireng ha ka elekshon sha ka Iingdorbar Thawaiñ ka Jylla ka ban long ha ka 27 tarik, Rymphang.
Napdeng kine ki 55 ngut ki kyrtong ki kynthup haduh 6 ngut ki Engineer, 8 ngut kiba la pyndep ïa ka Master Degree bad Ph.D, uwei u doktor sumar briew bad kumjuh u Chairman barim ka Garo National Liberation Army (GNLA) u Champion R Sangma, u President ka MPCC uba long ruh u MP ka Shillong Parliamentary Constituency u Bah Vincent H Pala u ban aireng na Sutnga-Saipung pyrshah ïa u MLA barim ka Seng Congress u Ma Shitlang Pale uba la kynthih sha ka AITC.
Ha kane ka thup ki don kumba 10 ngut ki MLA barim bad 7 ngut ki kyrtong Kynthei.
Ki don haduh 6 ngut ki MDC ba mynta ha kane ka thup kyrteng bad kine ki long u Bah Pynshngaiñlang N. Syiem (Pynthorumkhrah), Bah Ronnie V Lyngdoh (Mylliem), Batskhem Ryntathiang (Mairang), Gabriel Wahlang (Nongstoiñ), Charles Marngar (Mawhati) bad Carnes Sohshang (Mawkyrwat).
Ki kyrtong kiba la long teng ki MLA ki long u Dr Celestine Lyngdoh (Umsning), J Antonius Lyngdoh (North Shillong), ka Deborah Marak (Williamnagar), Billykid A Sangma (North Tura), Edmund S Sangma (Rangsakona), Sayeedullah Nongrum (Mahendraganj), Rophul S Marak (Rongara-Siju) bad Brigady Napak Marak (Bajengdoba).
Ki kyrtong kynthei ha kane ka thup nalor ka Deborah, ki don 7 ba kynthup ïa ka Kong Rona Khymdeit kaba dei teng ruh ka MDC barim na Nongpoh, ka Kong Venetia Pearl Mawlong (South Shillong), Kong Bethleen Dkhar (West Shillong), Dr Banidashisha Kharkongngor (Nongthymmai), Lakyntiew Sohkhlet (Sohra), Pynhunlang Nongrum (Mawkynrew), Victorealness Syiemlieh (Ranikor) bad Uttora G Sangma (Ampati).
Lah ruh ban kdew ba u Champion R Sangma u Pulit barim uba la bat ïa ka kyrdan DSP uba la kieng atiar bad long ruh u Chairman ka kynhun lehnoh ha Ri-lum Garo ka GNLA un aireng pyrshah ïa u Dr Mukul Sangma u Myntri Rangbah barim ka jylla uba long ruh u nongïalam ka liang Pyrshah ka Ïing Dorbar uba la mih khmat ïa ka Songsak ha kane ka kynti ba mynta.
Kiwei pat ki kyrtong ki long u Emlang Laloo (Nartiang), Nehemayah Tyngkan (Mokaïaw), Adrian Lambert Chyne Mylliem (Jirang), Marbud Dkhar (Mawlai), Manuel Badwar (East Shillong), Sardonik Nongkhlaw (Nongkrem), S Osborne Kharjana (Sohiong), Dannyson Kurbah (Mawphlang), Gopal Stone Hynñiewta (Mawsynram), Nehru Suting (Pynursla), Goldenstar Nonglong (Rambrai-Jyrngam), Timjim K Momin (Mendipathar), Frederick Sangma (Raksamgre), Dr Kapin Ch Boro (Tikrikilla), Augustine D Marak (Dadenggre), Roger Benny A Sangma (Dalu), Karak R Sangma (Chokpot).
Ka All India Trinamool Congress ha ka sngi Balang ka la pynbna paidbah sa lai ngut ki kyrtong ki ban aireng ha ka elekshon sha ka Iingdorbar Thawaiñ kiba kynthup ïa u Bah Robinus Syngkon na Raliang, u Longsing Bey na Nongpoh bad u Stepborne Kupar Synrem na Mawlai.