Kynnoh ba shoh u coach ïa u nongïalehkai Judo ba dang 8 snem haduh da mynsaw

Shillong, Jymmang 23: U Jobi Warlyrpih uba dei u nonghikai (Coach) jong ka Judo u la shah kynnoh ba u la shoh bad bom ïa u khynnah ïalehkai ba dang 8 snem karta haduh ba un da jngem bad mynsaw lut ka met ka phad bad ki kti ki kjat.
Katkum ka kurwoh khubor na ki nongïalehkai Judokas bad ka Meghalaya Judo Association ki la pynpaw ka jingsngewsih bad pynrem halor katei ka jingleh jong utei u nongai jinghikai.
“Na ka liang jong ka Meghalaya Judokas (Students) ba rim bad ba thymmai jong ka Meghalaya Judo Association, ngi dap da ka jing sngewsih kaba khraw bad ngi pynrem jur ïa ka jingleh donbor u nonghikai Judo (Jobi Warlyrpih), u ba la shoh la dat ïa i khynnah ïalehkai Judo ba dang 8 snem haduh ban da jngem bad mynsaw lut ka met ka phad bad ki kti ki kjat ruh.” “Ngi pynrem jur ruh ïa u Dipak Mallick, General Secretary Meghalaya Judo Association bad Joint Secretary Judo Federation of India kumno u la shah ïa u Jobi Warlyrpih ban leit ai jing hikai Judo ïa ki khynnah, haba kumba tip ma ngi une u Jobi Warlyrpih u kam ba lah ban hikai Judo da ma u haba ngi tip pat ba um pat don Judo Coaching Certificate bad ha kajuh ka por u Jobi Warlyrpih dalade ruh um nang ban ïalehkai Judo ruh.”
“Ngi na ka liang ki Meghalaya Judokas (Students) ngi kyrpad ïa u Dipak Mallick General Secretary ban ai jingpynshai halor kane, ngi dawa ruh ba u dei ban hiar noh na ka kam General Secretary bad Joint Secretary Judo Federation of India,” ong ka kyrwoh khubor.
Ki la dawa ruh ïa ki bor ka aiñ ba kin kem bad pynshitom ïa u Jobi Warlyrpih bad ïa ka tnad sport ba kan nym shah shuh ban leit ai jinghikai ïa ki khynnah.
“Kumjuh ngi dawa ba ka aiñ ka dei ban kem shi syndon bad teh kyndon ïa u Jobi Warlyrpih namar kane ka dei ruh pyrshah aiñ ïa ka Sports Ethics in Coaching. Ngi kyrpad ïa ki bor ka aiñ bad tnad Sports ruh ban nym shah shuh ïa u Jobi Warlyrpih ban leit ai jing hikai ïa ki khynnah Judo kumba la bthah bad aiti da ka lynti ka bym dei da U Dipak Mallick Meghalaya Judo Association bad joint Secretary Judo Federation of India.”
Ki la ïathuh ruh ba kum ki khynnah ïalehkai Judoka (Judoka Student), haba ki bud dien ïa ka rukom trei kam U Dipak Mallick ki la lap bad shem ba naduh 2015 hadien ba la shimti President da u Bah Phrang R Bareh ba na Jokai, U Dipak Mallick u la pynïaid ïa kane ka Meghalaya Judo Association la kumba ka dei ka Club shimet jong u hi.
“Naduh 2015 ym ju don Tournament kum State Level, School Level ne Inter District Level shuh ban pynbeit da ka Meghalaya Judo Association. Kumjuh ruh U Dipak Mallick bunsien u ju ailad wat da ki khynnah ba namar jylla ban mih khmat na ka Meghalaya Judo Association ha ki National Judo Championship da kaba pynduh lad ïa ngi ki khynnah trai jylla kumba ngi ïohsngew na kiwei ki para State Association ba ki kylli balei ym don khynnah ïalehkai Judo na Meghalaya,” ki la ong.