Satang katto katne bnai ban poi sha ka jingïajied MLA, ka liang synshar Meghalaya Democratic Alliance (MDA) kala mad ïa ka nem sniew kaba la long ka kum ka dak ïong ha kine ki saw snem tam ha u lakam ka jingsynshar jong ka. Baroh kine ki dak ïong ki wan ha ka dur jong ki jingtei, la ka long ki surok, ki jingkieng, ki ïing ophis bad kaba khatduh kadei ka jingtei ïa ka ïingdorbar Thawaiñ kaba thymmai jong ka jylla.
Ki paidbah ki dang kynmaw kyndiang ïa ka jingjulor ka jingkieng ha Dwar Ksuid ha ka surok hapdeng ka Umroi bad ka Bhoirymbong. Hynrei kadei pat ka surok kaba donkam bha naduh ba la plie bad pyntreikam ïa ka Shillong By Pass ha kine ki snem baladep. Ka jingjulor jong kane ka surok, kadei namar ka jingkit palat pud ki trok kit dewïong kat haduh ba ka jingkieng bapli ka la synjor bad kdiah tbuk. Mar mar la moramot ïa kane ka jingkieng da ki bor shipai Border Road Organisation (BRO). Hynrei tang hadien katto katne bnai, ki dak julor ki la sdang ban paw biang ha kane ka jingkieng bad kane ka jingjia ka la wanrah ka jingshah rkhie beiñ ha kiba bun ki liang, namar ba ym dei ba ka jia tang shisien, hynrei ka jia ar ne lai sien.
Hadien kane paw da ka jingtei ïa ka building ne ka jaka treikam jong ka Inter State Bus Terminus (ISBT) ha Mawïong, kaba tang hapoh ar bnai ba la shimti bad pyntreikam ïa ka, ki dak trei torti ki la paw shynna, naduh ka jingorpait ki kynroh, ka jingpei um ka tnum kaba la wanrah biang sa shisien ka jinglehraiñ ïa ka sorkar MDA. Ka pyrthei India ka la tip bad ïohi lut ïa kaei kaba jia ha kane ka jaka pynhiar bad kyntiew briew jong ki Bus kiba wan na kylleng ki jaka jong ka thaiñ Shatei lammihngi bad kumjuh na kiwei de ki bynta jong ka ri India. Hynrei kaba lyngngoh ka long ba ym shym don wat tang uwei u heh sorkar uban pynpaw ka jingsngewrem ne sngew diaw halor kane ka jingtrei torti ha kane ka jingtei ïa kane ka building kaba la wan plie khyllew da u Amit Shah, Myntri korbar ri jong ka ri India. La bun pynban ki jingïada ïa kaei kaba ym lah ban ïada.
Kaba khatduh kaba wanrah ka jinglehraiñ bad jingjah burom syndon ïa ka jylla, kadei ka jingkhyllem shi bynta na ka jingtei ïa ka ïingdorbar Thawaiñ ba thymmai jong ka jylla. Kane kadei ka jaka ba kyntang eh jong ka jingsynshar paidbah. Ha Meghalaya lei lei ka kham kyntang shuh shuh, namar ba kan dei ka sien kaba nyngkong eh ba ka Meghalaya kan ïoh la ka jong ka ïingdorbar ba pura hadien 21 snem hadien ka jingplud noh ka ïingdorbar thawaiñ kaba rim ha u snem 2001. Kaei kaba la pynpaw da u Executive Engineer PWD (Building) ka long ba kane ka jingtei kadei kaba la plan ne design ha kata ka rukom ban ïada na ka jingwan u jumai uba jur ruh. Hynrei ka jingkylli ka long kumno kat kata ka jingtei kaba lah ban ïada na u jumai, ka khyllem la ka khyllem hi ha ka haw haw. Kadei ban don kaei kaei ha lyndet jong kane ka jingkhyllem ka tnum pyllun ne ka dome ba ki ong.
Ka sorkar MDA na kane ka jingjia kam dei shuh ban shu ïada jubor haba mih ki kynrum kynram kiba kum kine, hynrei kadei ban long rangbah noh, ym dei shuh ban shu heh nia bad heh satang ka biria pynrkhie briew ne kdew kti tang sha ki sorkar kiba rim. Ka por ka la dawa ba kadei ban don ruh ka jingshim jingkitkhlieh bad ban wad bniah ban lap ïa ki daw tynrai balei ba kine ki jingtei ki pynbudnam bad pynjah burom ïa ka jylla. Haba kiba kum kine ki jia, u khnam uba ki paidbah ki thew hi u long beit namar ka jingbamsap. Kumta ki bor sorkar ne ki nongïalam kidei ban long shlur ban sei madan ïa kiba donkti bad ymdei satia ban ïada lada dei mano mano ruh. Lym kumta ka jylla kan nang ngam nang ngam.
