Kynmaw burom ïa ki riewshlur Garo kiba leit sha ka thmabah banyngkong ha France

0

Tura, Naitung, 17: Ki paidbah nongshong shnong jong ka rilum Garo ha ka sngi Saitjaiñ ki la rakhe ïa ka Garo Labour Corps Day kum ka jingkynmaw burom ïa ki riewshlur Garo kiba la leit sha ri France ban ïarap ïa ki shipai ha ka Thmabah Banyngkong.
Ïa kane ka jingrakhe la pynlong ha District Headquarters jong ka West Garo Hills ha kaba la ïashim bynta lang da u Deputy Commissioner jong ka West Garo Hills u Swapnil Tembe, u Superintendent of Police u VS Rathore, u Chairman jong ka Tura Municipal Board u JD Sangma, u Chief Executive Officer jong ka Tura Municipal Board u Rikse R Marak, kiwei de ki ophisar, ki rangbah bad ki nongtrei jong ka Tura Municipal Board (TMB).
Ïa kane ka sngi, la rakhe manla u snem ban kynmaw burom ïa ki dkhot jong ka Garo Labour Corps bad ïa kito kiba la aiti ïa la ka jingim bad ban trei minot ha ka kamram ba la bynshet hadien ba la pynrung ha ka 69th Garo Labour Corps ha ka ri France ha ka Thmabah banyngkong.
Kum ka jingkymmaw burom ïa kine ki riewshlur, ïa ka Garo Labour Corps Day la ju rakhe ha ka rukom kaba shongkun ha kaba ki kynrem ki lyndan ki ju buh syntiew ha u mot uba la tei ha Babupara, Tura bad da kaba siat suloi sha suiñ bad da kaba pynlong ïa ka jingduwai na ka bynta kine ki mynsiem ba la khladnoh.
Ïa ka jingleh burom shwa ban siat suloi la ïashim bynta da ki Pulit jong ka District bad ki Pulit jong ka 2nd MLP Battalion, Goeragre bad hadien kane la pynlong sa ka jingsngap jar kaba ar minit kum ka jingkynmaw burom ïa kine ki mynsiem ba la khladnoh.
Shwa kane, u Assistant Engineer jong ka Tura Municipal Board (TMB) u Cheyziel A Sangma u la pynkynmaw ïa ka jingthmu haba rakhe ïa ka Garo Labour Corps Day katba u Chairman jong ka Board u JD Sangma u la ïalam ïa ka jingduwai.
Ïa ka jingrwai ha ka ktien Garo ba la shna kyrpang ban kynmaw burom kine ki mynsiem ba la khladnoh da u Bestone D. Momin la rwai ha kane ka sngi.

Leave A Reply

Your email address will not be published.