Shillong, Ïaiong 24 : Ka projek umbam umdih kaba heh tam na ka bynta ka nongbah Shillong ïa kaba la tip kum ka Greater Shillong Water Supply Scheme (GSWSS) Phase-III ka la kynduh mawsiang kaba la poi haduh u pud ba imat ka lah ban dang shim por shuh shuh haduh ban da lah ban pyndep ïa ka.
Haba pyntip ïa kane, u Myntri ka tnad Public Health Engineering (PHE), Marcuise N Marak u la ong ba ka jingpyntrei ïa ka kam ka la ïaid shakhmat na ka bynta ban pyndep noh ïa kane ka projek.
“Hynrei, ka la sahkut noh namar kiba bun ki ishu bad kawei na kita kadei namar ka pisa kaba la mang na bynta ka skim kam pat dap satia. Na kata ka daw, ngi la hap ban wad lad ban ïoh pisa shuh na ki tyllong khubor bapher bapher bad kumta na bynta kane, ngi lah ban shim por shuh shuh,” u la ong.
Shuh shuh u ong ruh ba nalor kine, ki la mih sa kiwei pat ki ishu kynthup naduh ka ishu jaka, ka jingdonkam jingbit na ka tnad Forest bad ruh na ka Cantonment bad kumta ter ter ka ïai bteng.
U Myntri u ong ruh ba tad haduh mynta, kane ka projek ka la kynduh bun ki jingeh. “Ngi hap ban tih ïa ki surok namar ngi donkam banbuh ïa ki pipe, kumta kine ki dei ki ishu kiba la nang pynslem shuh shuh ban pyndep ïa ka projek,” u la bynrap biang.
Haba jubab halor ka jingkylli la ka don neem ka jingduna ka jingïatrei lang hapdeng ka tnad PWD bad PHE, u Myntri u la ong ba kane ka mat kadei kaba donkam ban ïathir ïatai bad shimkhia bha.
