Dawa ka HYC ïa ka tnat Pulit ban buh da ki Checkpoint hapoh u pud u sam ka Shella Police Station

Shillong, Ïaïong 24: Ka Hynñiewtrep Youth Council (HYC) ha ka sngi Palei ka la dawa ban buh ïa ki checkpoint ne Naka hapoh u pud u sam jong ka Shella police station kaba ha East Khasi Hills District hadien ba mih ki jingkynnoh ba jur bha ka jingwan rung beaiñ sha India da ki nong Bangladeshi lyngba u pud u sam ka Indo-Bangladesh.
U President ka HYC u Bah Roykupar Synrem ha ka shithi ba la phah sha u SP ka East Khasi Hills u la ong ba ka long kaba donkam ban buh ïa ki check-point ne Naka khamkloi katba lah hapoh u pud u sam ka Shella Police Station bad kumjuh ki jaka ba hab hapoh Sohra Civil Sub-Division, naba bun ki jaka kiba don ha khappud ka India-Bangladesh.
U la ong ba ha kum kine ki Check-Point ne Naka dei ban treikam 24×7 bad ban buh ha ki jaka kiba dang hab hapoh ka Sub-Division kaba long ruh katkum ka jingkwah jong ka tnat pulit.
“Ngi la kyrpad ruh ba dei ban don katto katne ki Standard Operating Procedures (SOPs) ba thikna ba dei ban pynmih da ki pulit kiba ap ha kine ki Check-Point ne Naka ban pynthikna ban don ka jingpeitngor kaba biang ban lap ïa ka jingwan rung beaiñ ki nong Bangladeshi bad ban khanglad ruh ïa ki kam runar ha khappud da kaba khmih bad jurip ïa ki riew shimet, ki kali bad ban lum ïa ki sakhi ba kynthup ïa ki digital evidence,” bynrap u Bah Synrem.
U la kynnoh ba ka jingwan rung beaiñ sha India da ki nong Bangladeshi la lap ba ka la kiew bha bha ha kine ki bnai ba la dep khamtam eh ha ki por mynmied lyngba ki jaka ba bun.
“La don ruh kiba ïathuh sha ngi ba ka jingwan rung beaiñ lyngba ki jaka khappud khamtam ban leh ïa ki kam khaiï ka la kiew bha ha ka thaiñ bad kine kiba wanrung tuh ki lah ban pyndonkam da ki lynti bad ban pyndonkam ruh ïa ki kali ban khaiï beaiñ da ka jingïarap jong ki katto katne ki ‘Dalals’ kiba dei ki nongshong shnong ban pynsuk ïa kane ka jingwanrung beaiñ sha u pud u sam ka India,” ïathuh u nongïalam ka HYC.
U la ïathuh ruh ba katkum ka jingtip ka seng kam shym la don kano kano ka check-point ne Naka ha ki surok kiba kongsan kiba pynïasoh ïa ka Shella bad kiwei pat ki shnong ha khappud ban leit sha Sohra bad Shillong, ba dang hab ha u pud u sam ka Shella P.S. khnang ban lap ïa ka jingwan rung beaiñ ki nong Bangladeshi bad kumjuh ruh ban khanglad ïa ki kam khaiï beaiñ.
U la ïathuh ruh ba ha kiba bun ki khep dei ki riew paidbah bad ki dkhot ki sengbhalang kiba ïarap lang ïa ki pulit ban bat ïa ki briew kiba don jingartatien bad ban aiti sha ki pulit.