Da ka hukum 163 BNSS pynjari ka DM ïa kiba pynïap pathar ïa ki dohkha ha wah Lawmei

Shillong, Ïaïong 24: Ka District Magistrate, East Khasi Hills District ka la pynjari da ka hukum hapoh ka kyndon 163 BNSS kaba khang pyrshah ïa ka jingpynïap beaiñ ïa ki dohkha bad ka jingpynjulor ïa ka sawdong sawkun hapoh ka shnong Rynsha, ka wah kaba don ha Lawmei kaba dang hab hapoh ka shnong Lawmei.
Kane ka jingpynïap ka lah ban long da kaba pyndonkam ki dawai bih bad ki tiar jingpynbthei ba kynthup ïa bleaching powder, ammonium-sulphate, pesticide, dynamite, ki jar bad kiwei kiwei da kino kino ki briew.
Ïa kane ka hukum la pynjari halor ka jingïoh kaiphod ba ki don ki runar kiba la pynïap pathar ïa ki dohkha ha shilynter ka Wah Rynsha, Wah Lawmei, kaba ha shnong Lawmei bad ki thaiñ ba marjan lyngba ka jingpyndonkam ïa ki dawai bad ki tiar pynbthei ba kynthup ïa bleaching powder, ammonium-sulphate, ki pesticide, ki dynamite, ki jar bad kiwei kiba long ka daw ba wanrah jingjulor bad jingma ïa ki dohum dohwah lada ym lah ban ïada.
Kano kano ka jingpynkheiñ ïa kane ka hukum kin shah pynshitom hapoh ka kyndon 223 jong ka BNS.
Kane ka hukum kan treikam noh mardor bad kan ïaineh tat haduh ban da pynbna da kumwei pat.